A fotografía do orzamento que o Estado aproba en materia de investimentos para a Galiza adoita ser moi diferente á execución dos mesmos que finalmente se fai. A cadea de incumprimentos neste sentido segue aumentando ano tras ano e ten un dos seus "puntos negros" nas áreas xestionadas por Adif e Renfe, infraestruturas e servizo ferroviario. Unha dinámica que semella que non vai ser diferente tampouco en 2022, xa que o propio Goberno español prevé que estas dúas empresas públicas acaben executando menos da metade dos investimentos que tiñan orzados para Galiza en 2022, mentres que noutros territorios do Estado volverá a ser maior a cantidade que se gaste que a orzada nun principio.
Así, e segundo os datos do Ministerio español de Facenda e Función Pública, cando finalice este ano apenas estarán executados 42,2% dos investimentos previstos na Galiza. Pola contra, en territorios como Madrid ou A Rioxa esas previsións son que se invista máis do que estaba orzado inicialmente nas contas xerais do Estado.
Segundo os datos do Ministerio, na Rioxa estas dúas empresas públicas prevén investir 138% máis que o que estaba presupostado.
No que atinxe a Madrid, esa porcentaxe é de case 103%, tamén por riba dos investimentos que estaban previstos nesa comunidade. Por cada 100 euros que se asignaron a Madrid para 2022 en investimentos de Adif e Renfe, finalmente gastaranse 103. No terceiro territorio con mellores expectativas de cumprimento, Nafarroa, os cálculos do Estado son que se cumpra por volta de 91%.
Chove sobre mollado
Esta fenda entre previsións orzadas e investimentos realizados por Adif e Renfe non é unha novidade no que respecta ás contas do Estado para a Galiza. Ao analizar o informe da Distribución territorial do investimento do Sector Público Estatal que elabora anualmente o Ministerio de Facenda compróbase que no que respecta a 2021, tanto Adif como Renfe volveron incumprir. Dos 146 millóns de euros previstos pola primeira para a Galiza só se executaron 51 millóns (34%); mentres que dos 22,5 millóns que Renfe ía investir, finalmente só o fixo con 9,8 millóns (43%).
Un comportamento que se encadea co de exercicios anteriores e que mesmo levou a que no Congreso e Senado se rexistrasen preguntas dirixidas ao Goberno español pedindo explicacións por tan baixo grao de cumprimento dos orzamentos destas entidades ferroviarias para coa Galiza.
Necesidades
Máxime cando o sistema ferroviario na Galiza acumula desde hai anos unha serie de necesidades e de reclamacións non atendidas, tanto en infraestruturas como no impulso de novas modalidades.
Neste último punto, un exemplo recente é o do impulso dun sistema de tren de proximidade. O Estado prevé nos vindeiros meses ampliar a proximidade entre diversas cidades en varios territorios do Estado, mais ningún deles é na Galiza. Polo que o país seguirá a ter a maior área metropolitana do Estado que carece des servizo ferroviario de proximidade: a área de Vigo, con 580.000 habitantes.
