As rebaixas fiscais do Goberno galego levan a Xunta a deixar de ingresar 1.114 millóns en dous anos

O conselleiro de Facenda, Miguel Corgos, avanzou onte que "hai marxe" para novas rebaixas de impostos nos orzamentos da Xunta da Galiza para 2024. Tamén, recoñeceu, para aquelas realizadas até agora, incluídas as bonificacións aos bingos e en materia de xogo. Corgos, iso si, afirmou que estas rebaixas e bonificacións "en absoluto" poñen en risco os servizos públicos, pois esa é unha "liña vermella". Porén, o Consello de Contas, ente fiscalizador das contas e da xestión económico-financeira do sector público galego, reprochou no seu día á Xunta da Galiza non avaliar os efectos e consecuencias desas deducións fiscais As rebaixas de impostos da Xunta da Galiza favorecen as grandes fortunas . Ao lle lembrar onte esta crítica do organismo fiscalizador, o conselleiro recoñeceu que "é un campo no que hai que mellorar" e asegurou que se está "traballando neste tipo de avaliacións". Corgos veu anunciar onte, pois, unha continuidade na política que o Executivo galego leva aplicando todos estes anos en canto a bonificacións e rebaixas fiscais. Unha política que non beneficia por igual todos os niveis de renda. O relatorio Panorama da fiscalidade autonómica ou foral, un estudo elaborado anualmente polo Rexistro de Economistas Asesores Fiscais (Reaf) e polo Consello Xeral de Economistas (CXE) concluía na súa edición de 2022, última publicada, que a presión fiscal na Galiza é reducida para as rendas altas e elevada para as baixas e medias. Facenda descarta impor un imposto especial a cadeas de supermercados O propio conselleiro anunciara a pasada semana nunha intervención no Parlamento galego que a Xunta mantería para 2024 a bonificación no imposto de patrimonio, unha medida que deixou as arcas galegas no presente ano sen 34 millóns de euros que non tiveron que pagar 7.700 fortunas. Corgos destacaba na súa comparecencia de onte que as galegas e galegos "aforrarán" nesta lexislatura ao redor de 1.300 millóns de euros por rebaixas de impostos. Mais os propios datos dos orzamentos mostran que a cifra que se deixa de ingresar pola política fiscal do Goberno galego é maior. Así, as arcas públicas perderon de ingresar 1.114 millóns de euros nas dúas últimas anualidades como consecuencia da política de recortes en gravames e impostos e como consecuencia de aumentar as bonificacións. Segundo os datos da propia Consellaría de Facenda, estas medidas implicaron 522 millóns en 2022 e alcanzarían este ano, segundo se estima no informe económico dos Orzamentos para 2023 da Xunta, os 592 millóns. En anos anteriores foron 448 millóns de euros (2020) e 501 millóns (2021). A Xunta da Galiza rebaixa os impostos aos bingos en 40% No que vai de lexislatura, logo, suman máis de 2.000 millóns os fondos que a Administración galega deixou de ingresar. Impostos e servizos No entanto, Miguel Corgos criticaba en 2022 en sede parlamentaria que a Galiza percibía ao ano ao redor de 800 millóns de euros menos por parte do sistema de financiamento autonómico dos que representaban os custos en materia de sanidade, educación ou políticas sociais. María Cadaval, profesora de Economía Aplicada da Universidade de Santiago de Compostela (USC), advertía en Nós Diario da existencia dunha "tendencia" no Goberno galego a ir por camiños "miméticos" aos de Madrid en canto a avanzar cara a maiores rebaixas de impostos. Mais, apuntaba, Madrid ten o músculo do 'efecto capitalidade' para poder compensar esa rebaixa de impostos e a Galiza non. "Véndese a mensaxe de que é bo baixar impostos, mais despois como se van pagar os servizos?", preguntaba a profesora da USC. A Xunta sobe a 50% a bonificación do Imposto de Patrimonio e Rueda insiste en que "é mellor baixar que subir" os gravames Desigual E a isto engádese, como recolle o mencionado informe Panorama da fiscalidade autonómica e foral 2022, que a política fiscal da Xunta da Galiza non beneficia por igual todos os niveis de renda. Así, a Galiza figura ente as tres autonomías onde as persoas contribuíntes con ingresos de entre 220.000 e 600.000 euros menos teñen que pagar. Así, para o tramo de máis 600.000 euros, a comunidade onde máis barato sae o IRPF é Madrid (abonarían 251.900 euros), seguida de Castela e León (257.000) e Galiza (263.000). A situación repítese nos segmentos con ingresos de 220.000, a 400.000 euros. Neste último, os contribuíntes na Galiza pagan ao redor de 169.00 euros, como en Castela e León. Só en Madrid terían que desembolsar menos con este IRPF (case 162.000). No outro extremo, un residente na Galiza cunha renda anual de 20.000 euros de IRPF pagaría 2.470 euros, unha contía superior á media estatal (situada en 2.320). Así, na Galiza as rendas altas pagan menos que a media estatal mentres que os tramos de rendas medias e baixas pagan máis. O sector do xogo espera volver saír beneficiado na nova desescalada da Xunta Para o economista Marcelino Fernández Mallo, tal e como apuntou a este diario, "a dereita mantense fiel ao dogma neoliberal de reducir impostos en calquera conxuntura. Tanto ten que as rendas gañen ou perdan poder adquisitivo, que a inflación estea baixo control ou desbocada". Novo presidente do CES Noutra orde, onte coñeceuse a proposta da Xunta da Galiza para presidir o Consello Económico e Social (CES) após a dimisión de Agustín Hernández no mes de setembro. O candidato é Manuel Pérez, ex alcalde de Vigo do PP e ex conselleiro nos Executivos de Manuel Fraga. Durante esta última etapa participou na posta en marcha da Renda de Inclusión Social (Risga). O Goberno galego 'perdoa' 162 millóns de euros en tributos ao sector do xogo Estado español ten uns dos seus eixos en deixar certa marxe aos territorios para fixar ou cobrar algúns tipos de gravames e impostos. O modelo de financiamento estabelece unha recadación normativa para cada comunidade autónoma. É dicir, a cantidade de diñeiro concreta que cada territorio debe ingresar nas súas arcas grazas a tributos cedidos e taxas propias como o imposto de transmisións patrimoniais onerosas, o imposto de sucesións e doazóns, os tributos sobre o xogo ou a parte autonómica do IRPF. Desta cantidade, as autonomías deben achegar ao fondo común do Estado 75% para que o sistema redistribúa posteriormente os recursos. Que sucede? Que se a recadación real obtida finalmente non se corresponde coa fixada polo modelo, as autonomías enfróntanse a un esforzo fiscal adicional para cubrir ese importante desfase. E iso é o que acontece na Galiza no que atinxe aos impostos e gravames sobre o xogo. A recadación que, en base a este modelo, debería facer a Xunta da Galiza neste sector alcanzaría perto de 190 millóns de euros. Mais a recadación real é de 28 millóns, segundo os últimos datos de execución orzamentaria. Esta 'fenda' non é exclusiva da Galiza mais si que esta é unha das comunidades onde resulta máis ampla. Eses 162 millóns sitúan Galiza como a quinta autonomía do Estado con maior 'desfase'. No pasado exercicio —2022—, aprobou unha bonificación de 20% nos impostos a casinos e bingos e de 30% nas máquinas comecartos. Para 2023, o PP propuxo unha nova rebaixa de 20% para os bingos.