A conselleira de Infraestruturas e Mobilidade, Ethel Vázquez, reunirase esta cuarta feira co secretario de Estado de Transportes, David Lucas, para abordar diferentes materiais pendentes en infraestruturas da Galiza, tales como o atraso dos trens Avril, a transferencia da autoestrada AP-9, a reconstrución do viaduto da A-6 e o plan director do corredor atlántico.
O encontro terá lugar hoxe na sede do Ministerio, en Madrid. A cita chega despois de que a pasada sexta feira, 29 de setembro, o propio secretario de Estado de Transportes informara de que Talgo trasladou ao Ministerio que "comezará a entregar as primeiras unidades" dos trens Avril –que permitirían levar a alta velocidade desde Ourense até o resto de cidades galegas– "no mes de decembro, se se cumpren as previsións desta compañía no proceso de homologación que esta empresa está a realizar ante a Axencia de Seguridade Ferroviaria". Así, a súa posta en funcionamento sufrirá un novo atraso, pois non será até o primeiro trimestre do vindeiro ano 2024.
A raíz destas palabras, a conselleira expresou que demandará hoxe explicacións ao secretario de Estado de Transportes, David Lucas, ante o novo atraso na posta en funcionamento dos trens Avril na Galiza, para o cal pedirá un calendario concreto.
"Problema de fabricación"
Cuestionado tamén pola data de chegada do tren Avril, o delegado do Goberno español na Galiza, Pedro Branco, indicou que, "neste momento", non se trata dun "problema" do Goberno de España, senón dun "problema de fabricación". "Está en fase de probas, por motivos de seguridade están a ultimar todos os detalles, ademais da propia formación", dixo.
Un estudo realizado pola Xunta da Galiza estabelece a necesidade de que o país dispoña de sete trens Avril, que permitan "cumprir os tempos de viaxe entre Madrid e as catro cidades que neste momento están a disposición de beneficiarse deste transporte", ademais das frecuencias "axeitadas", que serían de seis ao día.
A necesidade de que se recuperen todos os servizos de tren prepandemia, con maiores prazas e frecuencias por alta demanda, e o obxectivo de que a alta velocidade chegue a Lugo e Ferrol son outras das reivindicacións que exporá na reunión a conselleira.
