A candidata do BNG á Presidencia da Xunta, Ana Pontón, volveu esta sexta feira, primeiro día de campaña para as eleccións do 18 de febreiro, á súa casa familiar de Chorente, en Sarria (comarca de Sarria), para recoller a "aprendizaxe" que cultivou na cociña familiar.
Acompañada da súa nai Aurita, quen non dubidou en proclamar que a súa filla "valía para todo", e do seu pai Luís, ambos os dous moi emocionados; Ana Pontón defendeu o "orgullo" das súas orixes e a importancia de "non pórse límites" e que a Galiza "ten capacidade para facer grandes cousas".
É a segunda ocasión na que Pontón decide arrincar a carreira electoral na súa casa familiar. Fíxoo en 2020 por primeira vez na que era a súa segunda vez como cabeza de lista das eleccións galegas e, entón pasou o BNG de cuarta a segunda forza política, subindo de 6 a 19 escanos.
Pontón quíxo defender de novo o "orgullo de ser do rural e os valores da humildade e o esforzo" e proclamou que hai "gañas de cambio" e "esperanza", o que a convertería na "primeira presidenta" da Galiza tras seis homes á fronte da Xunta.
"Con mans libres e limpas", engadiu, noutro momento da charla cos medios de comunicación a súa nai Aurita, quen levou "anotado" o que quería dicir de Ana Belén Pontón Mondelo, Ana Pontón na política, Belén en casa.
"Cando tiña 18 anos se me imaxinaba que podería ser candidata á Presidencia da Xunta, diría que non", relatou Pontón, ante a emoción e bágoas nos ollos do seu pai, quen con iso fixo crebar tamén a voz da líder nacionalista.
"Se mo preguntades hai dez anos, seguramente tamén diría que non; se mo preguntades hoxe, pois vos diría que este país necesita unha presidenta, que son as eleccións en que podemos conseguilo", salientou.
Díxoo, co ánimo de trasladar "todo o aprendido nesta cociña". "O orgullo de nós, que non temos límites e o lugar do que vés e cal é a túa familia non pode condicionalo e que, desde logo, en certa maneira, é unha historia compartida con miles de persoas, ou porque nacemos no rural, ou os nosos pais e nais naceron no rural", manifestou.
A candidata do BNG á Presidencia da Xunta tamén reivindicou o "protagonismo" que ten que ter a Galiza na carreira cara ás urnas do próximo 18 de febreiro e, neste sentido, rexeitou calquera pretensión de convertelas "nunha especie de premio de consolación, de reválida". "Paréceme tamén unha falta de respecto; quizais noutras partes do Estado non se atreverían a facer iso", manifestou.
Quen o faga, dixo, "vaise equivocar e vano penalizar". "Se os galegos non son protagonistas desta campaña, cando imos ser protagonistas?", preguntouse. "Algúns ven o mundo desde Madrid e o escenario dos seus batallitas, mais a Galiza non ten que ser o escenario de batallitas. Esta vai ser unha campaña que temos que centrar na vida dos galegos e galegas en como darlles oportunidades e en como conseguir un país mellor". "E a partir de aí a cidadanía decidirá o que lle parece máis oportuno", sentenciou.
