A candidata do BNG á Presidencia da Xunta da Galiza, Ana Pontón, continúa a súa xira de presentación das candidaturas da formación nacionalista. Esta sexta feira foi a quenda de Ourense, cuxa lista encabeza a deputada Noa Presas e que ten Iago Tabarés, tamén parlamentario nesta lexislatura que rematou, como número dous.
Nun acto no que tanto Pontón como Presas estiveron arroupadas por candidatos e candidatas que integran a lista, a candidata do BNG afirmou que aspira a presidir un Goberno que, a partir do 18 de febreiro, "revitalice e faga valer" Ourense, aproveitando "o seu inmenso potencial". Convencida de que é necesario "acelerar o desenvolvemento desta parte do país", Pontón subliñou que o seu Goberno "estará á altura" e porá en marcha iniciativas para recuperar a actividade produtiva e reactivar tanto a economía como o emprego en Ourense, "apostando tanto polo rural, a ciencia e a tecnoloxía, como pola mellora das infraestruturas".
Tamén se comprometeu a "reforzar a sanidade pública para acabar cos recortes de persoal e servizos", como os que sofren nas localidades do Carballiño (comarca homónima), Xinzo (A Limia), A Mezquita (comarca de Viana) ou Verín (comarca homónima), así como no O Barco de Valdeorras.
"No BNG saímos a por todas. A partir destas eleccións, as ourensás e os ourensáns pasaremos de ser espectadoras a protagonistas do cambio galego", enfatizou, pola súa parte, Noa Presas.
Oferta de formación
Tamén esta sexta feira Ana Pontón, que continúa a súa xira de precampaña, comprometeu nun acto aberto en Cedeira (Ferrolterra) a ampliación dos ciclos formativos do IES Punta Candieira "para darlle máis opcións á xente moza, máis opcións laborais para que poidan pór en marcha os seus proxectos vitais".
Vivenda
Ana Pontón comprometeu tamén un plan de mobilización de vivenda baleira e unha lei para gravar grandes propietarios como son os fondos de investimento, a banca e as grandes empresas. Logo dunha xuntanza cunha representación do Colexio Oficial de Arquitectas da Galiza (COAG) en Compostela, a candidata do BNG a presidir a Xunta avanzou así algunhas das medidas en materia de vivenda que impulsará se chega ao Goberno galego.