Podemos Ourense e o BNG reclamaron que se tomen medidas tras escoitar uns audios nos que o rexedor ourensán, Gonzálo Pérez Xácome, pide a dous responsables municipais o pagamento da multa que recibiu en Vigo o coche que utiliza habitualmente o alcalde e da que, esta sexta feira, o propio Xácome responsabilizou a outro traballador.
En concreto, o xornal La Región avanzou estas gravacións, nas que o alcalde propón a estes funcionarios que digan que conducían eles e que estaban na cidade olívica para un congreso de tecnoloxía, algo ao que se opoñen, alegando que "vai saír o seu nomer" e que "lles van ir enriba".
"É un rollo electoral. O que non pode ser é que me pillen a min. Con iso perdo votos", recolle La Región en relación a esta multa, cuxos 1.200 euros xa estaban abonados, pero na que se solicitaba que se identificase o condutor.
Atribuíuna a outro traballador
Tras coñecer a existencia desta multa, o alcalde de Ourense, no pleno desta sexta feira, asegurou que o condutor era outro funcionario do concello e que viaxaba a Vigo "por unha causa xustificada".
A multa foi imposta o 3 de setembro de 2022, un sábado, cando sobre as dez da noite o vehículo oficial do Concello de Ourense foi cazado por un radar fixo, nas inmediacións de Samil, a 88 km/hora, nunha zona limitada a cincuenta.
A multa ascendía inicialmente a 400 euros, pero incrementouse até os 1.200 ao non identificar o condutor até o pasado mes de abril. Non obstante, segundo adianta La Región, o Concello de Vigo emitiu unha resolución na que daba conta das alegacións nas que se identificaba o condutor. Tras isto, deixaron a sanción en 400 euros, 200 por pronto pago, e a retirada de catro puntos do carné.
A deputada do BNG Noa Presas, o deputado Iago Tabarés e o portavoz e candidato municipal nacionalista Luís Seara, acudiron este sábado aos Xulgados de Ourense para presentar ante a Fiscalía un escrito no que reclaman a posíbel comisión de delitos derivados a partir destes audios.
Desde Podemos, Toño Naval, candidato de Agora Ourense, reclamou a dimisión de Xácome. "Non pode seguir un segundo máis á fronte da alcaldía de Ourense", afirmou, tras considerar que estes feitos son "moi graves".
