O ministro de Transportes e Mobilidade Sostíbel, Óscar Puente, ratificou esta cuarta feira que os trens de alta velocidade que conectan Vigo e Madrid estarán operativos antes do 31 de marzo, e a partir do primeiro día do devandito mes comezaranse a vender os billetes. O ministro celebrou durante a súa comparecencia no Congreso para explicar as liñas xerais do seu departamento na presente lexislatura a chegada dos trens 106 de Renfe ou Talgo Avril á Galiza.
Ao seu xuízo, este fito reducirá os tempos de transporte desde Galiza a Madrid, de modo que o traxecto realizarase nun período de tempo "moi breve" entre ambos os territorios. "Creo que é algo polo que debemos felicitarnos todos", apostilou o ministro.
O anuncio de que definitivamente chegarán estes ferrocarrís de alta velocidade en maio, porén, após innumerábeis atrasos. A primeira data prevista era xaneiro de 2021, hai xa tres anos, e logo prolongouse sucesivamente pasando por mediados de 2022, finais de 2023 e agora, de cumprírense os últimos prognósticos do ministro Puente, en marzo deste mesmo ano.
Tren de proximidade
Tamén lembrou que na Galiza está a iniciarse o estudo da implantación dun sistema ferroviario de proximidade, ao abeiro do acordo de investidura entre o PSOE e o BNG. Aliás, Puente destacou que desde xuño de 2018 no país licitáronse máis de 2.750 millóns de euros correspondentes ao Ministerio de Transportes, con especial énfase no destinado a aeroportos (+257%) e ferrocarrís (+195%).
