Feixoo déixase querer: tomará "decisións" en función do que pida o PP

O presidente da Xunta, Alberto Nuñez Feixoo, volveu a posicionarse na crise do Partiddo Popular (PP) e asegurou que "tomará decisións" en función do que necesite o partido e do que lle pidan que faga.

Feixoo, ao igual que na segunda feira, volveu a deixarse querer, mais sen chegar a confirmar que se postular como candidato a liderar o PP estatal, que agora mesmo segue a ter a Pablo Casado como presidente.

Nun acto que tivo lugar en Pontevedra, o presidente do Goberno galego  afirmou que "todos, eu entre eles, debemos ter a responsabilidade de estar á altura das circunstancias. Todos somos responsabeis da situación". Defendeu que "todos teñen que estar á altura das circunstancias e tomar decisións".

Mentres o dirixente popular non abandona a ambigüidade de se presentará a súa candidatura a presidir o PP estatal, cada vez son máis as informacións que afirman que Feixoo é o candidato dos baróns e referentes territoriais da formación política.

Pinza Feixoo-Ayuso a Casado

O presidente da Xunta e líder do PPdeG, Alberto Núñez Feixoo, intercambiou chamadas cos diferentes 'baróns' do seu partido no marco da crise interna que estorou no PP como consecuencia da guerra aberta entre Pablo Casado, e a presidenta da Comunidade de Madrid, Isabel Díaz Ayuso.

 

Precisamente, fontes do PP galego confirmaron que Ayuso é unha das dirixentes coas que Feixoo mantivo conversacións, aínda que subliñan que falou con ela e con "moitos" outros 'baróns' e compañeiros de partido nos últimos días, ante a "situación de colapso" da formación, segundo as palabras que utilizou este luns o propio presidente da Xunta.

Numerosos medios de comunicación afirmaron durante a segunda feira, que, nesa conversa, tanto Feixoo como Ayuso acordaron unha estratexia para descabalgar a Casado como presidente estatal do PP.