Alberto Núñez Feixoo coñece para que serven os dossiers. Un deles, elaborado con ducias de fotos recollidas nun rexistro policial á vivenda do traficante Marcial Dorado, serviu no seu momento para apartar o presidente galego da carreira da sucesión de Mariano Raxoi e posibilitar, finalmente, a chegada de Pablo Casado á presidencia do partido. Ninguén dúbida no círculo máis próximo de Feixoo que a razón central para explicar a súa posición nese proceso foi o temor a que aparecesen novas probas da relación con Dorado e o convencemento de que a súa filtración ao diario El País foi responsabilidade de Soraya Saénz de Santamaría.
As derivadas políticas
A denuncia de espionaxe de Isabel Díaz Ayuso contra a dirección do PP, a quen acusa de actuar "de modo inxusto e cruel contra min" para destruíla, e a reacción do partido, abríndolle un expediente "por acusacións gravísimas, case delitivas" tras coñecer información "sobre un suposto cobro de comisións en beneficio do círculo" da presidenta madrileña, ten derivadas legais e políticas. As primeiras non tardarán en chegar á xustiza. Porén, as segundas semellan máis definitivas para a sorte do principal partido da dereita española.
O presidente galego non demorou a súa toma de posición na liorta na rolda de prensa posterior ao Consello da Xunta de onte. Na liña dos seus movementos dos últimos meses, tendentes a debilitar con delicadeza o liderado de Pablo Casado, converteuse en xuíz e parte para ditaminar a inocencia de Díaz Ayuso e cargar contra a dirección do partido pola suposta espionaxe, financiada con fondos públicos, da Empresa Municipal da Vivenda do Concello de Madrid. Feixoo afirmou que "non procede contratar a ningún investigador privado para espiar un compañeiro", mais recoñeceu "certa preocupación pola situación orgánica que está a vivir o PP en Madrid. Chove sobre mollado e levamos varios meses ante un asunto que debería estar resolto".
O momento de Feixoo
Feixoo atópase diante da súa segunda oportunidade. A febleza de Pablo Casado e o seu equipo, o convencemento en sectores cada vez máis amplos do poder económico da incapacidade do actual presidente do PP para liderar unha opción ao PSOE, a debilidade interna de Díaz Ayuso para presentarse como alternativa a nivel estatal e o temor dos dirixentes territoriais da formación a seren superados por Vox colocan o mandatario galego nunha situación inmellorábel para saltar a Madrid e aspirar a liderar os populares.
Está por ver se Feixoo dá o paso ou pola contra renuncia a dirixir o partido como en xullo de 2018. Porén, a diferenza daquela, neste momento todos, non só el, contan con dossiers.
