Feijóo é un "marxista"

Ademais dun farsante –hipócrita, mentireiro, troleiro, patrañeiro, segundo o Dicionario Xerais de sinónimos–, Feijóo é un "marxista", de Groucho Marx, convencido: "Estes son os meus principios. Se non lle gustan, teño outros". Quen debería gobernar? "Feijóo propone que gobierne la lista más votada para no reinterpretar lo que dicen los ciudadanos" (España Exterior, 3/5/2011). "Feijóo propone al PSOE de Lugo que gobierne la 'lista más votada'" (Europa Press, 30/4/2011) para "respetar a la democracia y a los votantes". Proposta para que a cumpran todas as organizacións políticas excepto o PP. Sabemos o que promete o PP nas campañas electorais e o que fai despois das eleccións. En Sada o BNG conseguía a alcaldía nas eleccións municipais de 2003. Poucos meses despois, xaneiro de 2004, Ramón Rodríguez Ares (significado franquista, que foi alcalde de Sada polo PP de 1979 a 2007) recupera a alcaldía co voto dun tránsfuga e portavoz do PSOE. Na campaña electoral das municipais de 2011 Ernesto Anido, candidato do PP, prometía que nunca pactaría co PDSP (Partido Demócrata Sada Popular, creado por Ramón Rodríguez cando é expulsado do PP). O BNG era o partido máis votado e tivo 5 concelleiros, PDSP 5 e 4 o PP. O PP, que foi a terceira lista máis votada, conseguía a alcaldía co apoio do PDSP. Todo co visto bo de Feijóo. Nas eleccións municipais de 2019 en Ourense a candidatura máis votada foi o PSOE, pero o PP non dubidou en apoiar para a alcaldía o candidato da segunda máis votada, Democracia Ourensá (DO). Durante esa campaña electoral en Ourense Feijóo cualificaba como "letal" a posibilidade dun pacto con Gonzalo Pérez Jácome (DO). Despois aceptou que o PP apoiase o líder de DO e mantivo a Jácome como alcalde despois da crise interna de DO. Todo a cambio de que DO garantise o apoio a José Manuel Baltar como presidente da Deputación de Ourense. Despois de todas estas experiencias, El País de 12 de marzo de 2022 titulaba: "Feijóo defiende que gobierne la lista más votada pese a que el PP hace lo contrario". Se o PP cumprise esa promesa, o PSOE tería a presidencia de Andalucía, Madrid, Castela-León e Murcia, despois das eleccións municipais e autonómicas de 2019. Durante todo 2022, xa como presidente do PP, Feijóo continuaba prometendo facer no futuro o contrario do que fai hoxe o PP, é dicir, gobernar con Vox se non gaña as eleccións e necesita os seus votos. No programa Espejo Público (Antena 3, 23/12/2022), manifestaba: "Si no gano las elecciones, no puedo gobernar; espero que el señor Sánchez diga lo mismo (...) Yo quiero ser presidente si gano las elecciones; si no las gano, no". Insistía que despois das eleccións xerais de 2023 non buscará maiorías para gobernar se non consegue máis escanos que o PSOE. É público que o PP non foi a candidatura máis votada en moitas comunidades autónomas e concellos e que preside esas administración co apoio de Vox, como en Castela-León. A contradición e a mentira como método O xornalista Daniel Salgado facía esta análise das súas políticas e titulaba: "Feijóo, la contradicción como arte de hacer política". Feijoo adiantaba o 5 de setembro de 2022 que presentaría un Plan enerxético cun amplo abano de medidas, entre outras: "Extender la rebaja del IVA del gas y electricidad al invierno". A verdade é que o PP abstívose no votación para rebaixar o IVE da electricidade do 21 ao 10% até finais de 2022. Anteriormente pedira ao Goberno rebaixar o IVE da electricidade, pero cando o Goberno leva ao Congreso esa rebaixa o PP abstense. E pouco despois Feijóo pide a prórroga desa rebaixa que eles non aprobaron; un fenómeno! Non é de estrañar que con estes comportamentos moita xente cualifique a Feijóo como "vendedor de fume" e "trilero político". O cambio continuado de opinión é unha das características de Feijóo. Criticaba a prórroga do estado de alarma pola pandemia o 26 de outubro de 2020 e manifestaba que era "un palo sin precedentes al sector hotelero y de servicios". Pero a Xunta de Galiza continuou aplicando peches e confinamentos nos meses seguintes. Feijoo reclamaba ao Goberno, antes de Nadal, a obrigatoriedade do uso da máscara na rúa e pouco despois criticaba ao Goberno por non retirar esa medida. O xornalista Xosé Hermida fala de "Método Feijóo" (El País, 16/3/2022): "El domingo ofrecía pactos a Sánchez y el lunes acusaba al Gobierno de forrarse con los impuestos". En 2009 dicía: "No se puede gastar lo que no se tiene", criticaba o "despilfarro" da Xunta (PSdeG-BNG), pero o hospital Alvaro Cunqueiro de Vigo construíuse mediante unha colaboración público-privada, comprometéndose a pagar anualmente 72 millóns de euros á concesionaria privada até 2035, cun custo total de 1.400 millóns de euros.