O ex alcalde de Cambre Manuel Rivas (PP) acepta dous anos de prisión por prevaricación e malversación

Dous concelleiros do seu goberno mostraron conformidade coa mesma pena. Os feitos xulgados remóntanse a 2012 e teñen a ver coa "fraudulenta" adxudicación do festival Brincadeira Rock in Cambre, outorgado a dúas empresas saltando os controis administrativos e "causando un prexuízo económico ás arcas municipais de 446.866,06 euros", segundo a Fiscalía.
Manuel Rivas, ex alcalde de Cambre. (Foto: Elisardojm)
photo_camera Manuel Rivas, ex alcalde de Cambre. (Foto: Elisardojm)

O ex alcalde de Cambre Manuel Rivas e dous dos concelleiros do anterior equipo de goberno, Santiago Ríos e Felipe Andreu, aceptaron dous anos de prisión por prevaricación e malversación de fondos públicos pola organización en 2012 do festival Brincadeira Rock in Cambre, que se outorgou a dúas empresas saltando os controis administrativos e "causando un prexuízo económico ás arcas municipais de 446.866,06 euros", segundo a Fiscalía.

Fixérono no xuízo fixado para esta segunda feira na Audiencia Provincial da Coruña, após un acordo entre o Ministerio Público e as defensas ao recoñeceren os feitos o tres cargos públicos e acordarse unha rebaixa da pena ao incluír atenuantes de dilacións indebidas e de reparación do dano, que os acusados aceptaron. Os ex edís do Partido Popular foron condenados, aliás, a seis anos de inhabilitación para exercer cargos municipais.

A respecto das indemnizacións, os acusados están condenados a abonar 160.000 euros en concepto de indemnización ao Concello de Cambre, dos cales xa están consignados 148.333. O resto, 11.667 euros, deberá ser pagado entre os tres condenados. Alén dos tres ex concelleiros, tamén había outros cinco procesados, particulares e empresas, que foron declarados absoltos dos delitos que se lles imputaban.

Inicialmente, o Ministerio Público pedía para Manuel Rivas, os dous concelleiros e os dous responsábeis das empresas implicadas penas de cinco anos e medio de cárcere por malversación de caudais públicos en concurso con delitos de prevaricación administrativa. Alén da pena de cárcere, tamén solicitaba unha inhabilitación para cargo público de oito anos.

Sen avais nin garantías de retorno

Os feitos, denunciados pola organización política Unión por Cambre, remóntanse ao ano 2012, cando o Executivo local encabezado por Rivas adxudicou a dúas empresas de forma fraudulenta a organización do festival Brincadeira Rock in Cambre. O alcalde estabeleceu conversas previas a febreiro de 2012 co obxectivo de "eludir" a metodoloxía e os controis fixados na lexislación de contratación pública para, deste modo, conceder "a dedo" a organización dun evento de catro días de duración.

O acordo, plasmado como convenio do sector público e por valor de 240.000 euros, foi asinado o 1 de febreiro de 2012 polo rexedor e os responsábeis das dúas empresas encargadas de organizar o festival de música, que tivo lugar no verán dese mesmo ano. "Todos eles estaban postos de común acordo para defraudar as arcas municipais", xa que eran coñecedores de que a forma de proceder "evitaba" o control dos servizos municipais e anulaba "posíbeis competidores que se puidesen presentar para poxar polo contrato".

O convenio estabelecía a obriga de devolver os 240.000 euros asignados á organización do festival, pero non se exixía "ningunha garantía ou aval que asegurase o retorno do diñeiro". Tampouco formaba parte do convenio unha memoria técnica que acreditase a capacidade das empresas, que carecían de avais, traballadores "nin ningún elemento" para determinar a súa solvencia económica e técnica.

A maiores de evitar todo tipo de control previo, as facturas abonáronse "sen comprobar a efectiva realización" do consignado nelas e "sen memoria que determinase que se debía pagar". Ademais de Manuel Rivas e os dous titulares das empresas, tamén estaba implicado o entón tenente de alcalde de Cambre, avogado de profesión e encargado dos borradores do convenio.

O terceiro membro do Goberno municipal implicado é responsábel dos feitos por participar na preparación do convenio e por configurar seis facturas de case 40.000 euros abonadas ás empresas. Os cálculos do Ministerio Público cifran en 446.866 euros o prexuízo económico causado contra as arcas municipais, contía que se reclamaba inicialmente a todos os procesados en concepto de indemnización ao Concello de Cambre.

Branqueo de capitais

Paralelamente, xunto á adxudicación fraudulenta da organización do festival tamén foi sometida a xuízo a xestión dunha das empresas implicadas, cuxos responsábeis quedaron absoltos dunha operación de branqueo de capitais. Segundo figura no escrito de acusación inicial, o dono da empresa empregou 245.000 euros do diñeiro recibido do Concello de Cambre para ampliar o capital de compañía até alcanzar os 249.000 euros.

Dous anos despois, vendeu a totalidade da empresa por un euro a unha persona que, días máis tarde, volveu vender de novo a compañía a un terceiro. Estas dúas persoas son curmáns e tiñan menos de 20 anos no momento dos feitos. O primeiro unicamente era titular dunha moto e o segundo estaba inscrito no rexistro de morosos.

Inicialmente, Fiscalía considerou a manobra como unha operación para colocar un 'home de palla' á fronte da empresa á última persoa en asumir o temón da compañía quen, meses máis tarde, obtivo préstamos bancarios por 55.000 euros, ademais de actuar como fiadores de terceiras empresas por valor dun millón de euros.

Así as cousas, o Ministerio Público pedía cinco anos de cárcere para o administrador inicial da empresa e outros catro para os outros dous implicados, para os que, ao mesmo tempo, solicitaba multas que ascenden a 240.000 euros e un millón de euros, respectivamente.

comentarios