A deputada do BNG Olalla Rodil rexistrou onte unha iniciativa parlamentaria para esixir á Xunta da Galiza a apertura "inmediata e coa máxima dilixencia" dunha investigación sobre a "filtración" a empresas de residencias de persoas maiores das datas e horas nas que van recibir a visita dos servizos de Inspección.
Así o trasladou nun comunicado, en referencia á denuncia da Asociación Galega de Inspectores e Inspectoras de Servizos Sociais (Agiss). "A denuncia é gravísima, suporía unha vulneración da lei e un intento por obstruír, por obstaculizar desde o propio Goberno da Xunta, o labor dos servizos de Inspección", advertiu a viceportavoz primeira do BNG na Cámara.
Na súa iniciativa, Rodil lembra que foi a propia Agiss quen fixo saber publicamente que membros da Consellaría de Política Social "filtraban ás empresas propietarias e xestoras das residencias o día e a hora prevista para as visitas dos inspectores".
Pola súa parte, a Xunta da Galiza negou "con total contundencia" as acusacións. "Son acusacións moi graves, sen probas e que carecen de veracidade", conclúe.
