luns 06/12/21

Mil fotos para coñecer o gris día a día do movemento franquista en Pontevedra

O Servizo de Patrimonio Documental e Bibliográfico da Deputación catalogou e dixitalizou fotografías que levaban décadas gardadas e agosta pasan a estar dispoñíbeis para quen queira a través do buscador Atopo.

franquismo mondariz deputación
Visita do ministra franquista José Solís a Mondariz, 1957 (Foto: Deputación de Pontevedra)

“Poñer cara a personaxes que formaron parte da cúpula franquista do Goberno represor e non só poñer cara ás vítimas”, manifestou María Ortega, deputada de Memoria Histórica da Deputación de Pontevedra, ao presentar o resultado do traballo desenvolvido polo Servizo de Patrimonio Documental e Bibliográfico da Deputación: a catalogación e dixitalización de 971 imaxes do ‘Movemento’ franquista na provincia.

As imaxes que compoñen este fondo abranguen un espazo temporal de 8 anos, de 1951 a 1959, que se corresponden cos mandatos de tres gobernadores civís, á súa vez xefes provinciais do Movemento: Elías Palao Martialay (1951-1956), Alberto Martín Gamero (entre febreiro e abril de 1956) e Rafael Fernández Martínez (1956-1961).

As fotografías organízanse en 22 albumes concibidos como expedientes de prensa da Xefatura. Dixitalizáronse 971 imaxes para favorecer a súa conservación e facilitar a súa posta a disposición a través do metabuscador Atopo.

 Con respecto á súa catalogación e contextualización levouse a cabo un importante traballo de documentación (apoiado nos recortes de prensa existentes nos albumes e noutras fontes bibliográficas e documentais) para facilitar a identificación de actividades e de persoas, principalmente cargos políticos da época.

A imaxes poden agruparse en diferentes temáticas ou categorías, todas elas determinadas polas actividades políticas da Xefatura e do Goberno civil.

Así, atopamos imaxes de actos propiamente internos do Movemento (visitas de cargos ministeriais, nomeamentos, reunións de cargos ou xefes locais…), de actos de louvanza do réxime franquista  (conmemoración en honra dos caídos, do fin da Guerra civil, da fundación das falanxes galegas...), fotografías que reflicten aspectos sociais (actividades relacionadas coa beneficencia e co auxilio social, entregas de vivendas da obra sindical…) e dun modo destacado imaxes de visitas e percorridos do gobernador civil correspondente polos concellos e comarcas da provincia, na maior parte dos casos co fin de inaugurar obras e infraestruturas, convertidas en verdadeiros acontecementos sociais para a súa veciñanza.

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Este conxunto de fotos vencéllase directamente á colección de fotografías da Xunta de Axuda a Municipios e á colección do Servizo de Cooperación, e componse de máis de 4.000 fotografías que reflicten a vida política, económica e social dunha época.

 O departamento de Memoria Histórica enviiou unha ligazón ás asociacións para que saiban da existencia deste fondo.

Mil fotos para coñecer o gris día a día do movemento franquista en Pontevedra
comentarios