Entidades da emigración e do exilio foron recibidas esta segunda feira no Concello de Rianxo (O Barbanza) como un xesto de recoñecemento a Alfonso Daniel Rodríguez Castelao. Motivou esta visita a Rianxo o feito de seren representantes dalgunhas das entidades promotoras do Manifesto para que Castelao, pola súa condición de presidente do Consello da Galiza, sexa proclamado como primeiro presidente da Galiza.
Introduciu o acto o secretario xeral do Partido Galeguista, Francisco López Franco, que deu a benvida aos asistentes e explicou o sentido do evento, dando paso ao alcalde de Rianxo, Julián Bustelo, que renovou o a vontade do concello por divulgar a figura de Castelao e con el recoñecer a importancia da Galiza exterior, das persoas que forman o continxente humano da diáspora.
O cineasta galego-arxentino Xan Leira fixo as funcións de introducir as diferentes persoas que interviron: polo Centro Betanzos, María Carmen Castro, secretaria, e Bernardo Rey, tesoureiro (á vez que presidente do Fogar Galego para Anciáns); Diego Martínez Duro, ex presidente da Federación de Entidades Galegas de Arxentina e asinante do manifesto; polo ABC de Corcubión, Carlos Ameixeiras, presidente; polo Centro Galicia de Bos Aires, José María Vila Alén, presidente da sinatura do manifesto, quen afirmou que "neste documento o que facemos é constatar unha verdade histórica inapelábel, que Castelao foi o primeiro presidente da Galiza por selo do Consello. El é a cartografía que nos guía para non perdernos. En Castelao cabemos todos, só precisamos ser galegas e galegos".
"En Daniel Castelao cabemos todos nós"
Vila Alén, tamén representante do Colexio Santiago Apóstolo e membro do consello de administración da delegación arxentina da Fundación Galicia América, referiuse ao sentido do manifesto como o recoñecemento dunha verdade histórica, a constatación de que Castelao está por riba de todos nós. "En Castelao cabemos todos nós, sempre que nos sintamos galegas e galegos", aseverou Vila Alén.
Polo Centro Cultural da Estrada na emigración, interviu o seu presidente, José Manuel Besteiro, que lembrou os vencellos de Castelao coa Estrada polo seu casamento con Virxinia Pereira, reafirmándose no compromiso adquirido na sinatura do manifesto e no compromiso de fidelidade á figura do autor do Sempre en Galiza.
O acto rematou coa intervención do voceiro do BNG, Xusto Ordóñez, quen agradeceu ás diferentes representacións o seu compromiso co país, con Rianxo e con Castelao, rememorando os vencellos da súa vila coa comunidade emigrada e co exilio. E rememorando que Castelao non só foi valorado pola comunidade galega, o seu prestixio estarricouse até as comunidades vasca e catalá, onde aínda conserva todo o seu prestixio político e humano.
A seguir fíxose unha visita guiada polo alcalde á casa natal de Castelao. O rexedor reiterou a vella vontade do concello por adquirir a propiedade e poñela ao servizo da veciñanza da súa vila e da Galiza, e unha ofrenda no seu monumento. As persoas asistentes remataron a xornada cun xantar de confraternidade onde se desenvolveu unha nova sesión de traballo.