Os integrantes da Comisión Pro-Memorial ás Vítimas do Franquismo en Ferrolterra denunciaron "a continua lentitude" do Concello de Ferrol na tramitación e execución dun monumento en recordo das persoas que faleceron como consecuencia da persecución que sufriron na ditadura. Con todo, o Goberno local asegura que xa está a traballar niso.
Un dos portavoces do organismo, Ton Blanco, denunciou que hai "razóns obxectivas para alarmarse da desidia da Alcaldía", á que culpan dos atrasos, xa que "se lles pode botar a culpa aos técnicos do Concello ou tamén os arquitectos, pero non é convincente".
Nunha rolda de prensa ofrecida esta segunda feira no Concello de Ferrol, en compañía dos portavoces municipais de Ferrol en Común e BNG, Jorge Suárez e Iván Rivas, respectivamente, Blanco criticou que o pasado 2022 se lles asegurou "que estaría inaugurado antes de que finalizase o ano".
"O cal non só incumpriron, dáse o paradoxo que a estas alturas de 2023 aínda non estea inaugurado. É un absurdo que o monumento leve un mes realizado (obra do artista Manuel Patinha) e con todo non se poida inaugurar por non ter a base aínda realizada", dixo, para asegurar que acumula un atraso de dous anos.
"Esperemos que o monumento sexa unha realidade antes de que finalice o mandato, aínda que debido ás continuas demoras, varios familiares faleceron sen poder velo", lamentou.
Ademais, o portavoz desta plataforma adiantou que teñen previsto organizar un acto de homenaxe ás vítimas que terá lugar o 28 de abril, no Teatro Jofre de Ferrol, e ao que convidan o alcalde da cidade, o socialista Ángel Mato, a participar.
Resposta do Goberno
Desde o Goberno de Ferrol, a concelleira de Patrimonio Histórico, Eva Martínez, lamentou que "unha parte de integrantes desta plataforma acusen o Goberno de desidia", xa que detallou que "se hai un goberno que impulsou dunha maneira certa este memorial, é precisamente este".
Martínez asegurou que no ámbito administrativo tiveron que "partir de cero, xa que non había nada en firme", e comezaron "a tirar adiante no ano 2021".
A edil socialista manifestou que "despois de numerosas dificultades, temos xa unha figura realizada, de forma altruísta e xenerosa, polo escultor Manuel Patinha e agora estamos a ultimar a redacción dunha memoria para contratar a dirección de obra para a construción dunha base, que ademais da estatua, terá os nomes das vítimas da ditadura e represión franquista".
