Xi fala con Zelenski e enviará un representante a Kíiv para negociar a fin da guerra en Ucraína

Beijing deu a cuarta feira un novo paso para levar á práctica a súa proposta de paz para a guerra en Ucraína, que insta a comunidade internacional a outorgar un apoio xeral ao cesamento das hostilidades, algo ao que se sumaron países como o Brasil, Suráfrica, Exipto, Indonesia, Hungría ou a India. Nese sentido, a chamada de case unha hora do presidente chinés Xi Jinping ao seu homólogo ucraíno, Volodimir Zelenski, a primeira desde a invasión rusa, foi definida por este último como “longa e significativa”, incidindo en que a conversa telefónica e o nomeamento do embaixador de Ucraína en Beijing -nomeado pouco despois de facerse público o diálogo- “dará un poderoso impulso ao desenvolvemento das nosas relacións bilaterais”. Pola súa parte, CCTV trasladou que Xi comunicou que a China concentrará os seus esforzos en promover as conversas de paz e alcanzar un alto o fogo que free os combates o antes posíbel, para o que desprazará a Ucraína un enviado especial encargado de negociar un “acordo político”, que tamén viaxará a outros Estados “para ter comunicación profunda coas partes interesadas”, sinala o China Daily. Na xuntanza, Xi reiterou que o país asiático defende a paz en Ucraína, así como que o eixo central da súa posición é facilitar as conversas que rematen co conflito, insistindo en que a única saída pasa pola negociación. Aliás, salientou a súa “esperanza” de que as partes implicadas “reflexionen sobre a crise de Ucraína e busquen conxuntamente un enfoque para garantir unha paz duradeira en Europa”, recolle o medio chinés. Ao tempo, prensa local sostén que Xi subliñou perante Zelenski que Beijing, como “potencia responsábel”, non pode observar a deterioración da guerra “en silencio”, polo que recalcou que non “alimentaremos o lume” e que o país “non ten intención de beneficiarse” do conflito bélico. O mandatario tamén fixo fincapé en que a China está preparada para cooperar con Ucraína de forma independente á evolución da situación internacional, após remarcar o impacto no mundo dos combates no país eslavo. Entrementres, a prensa asiática recolle o agradecemento de Zelenski a Beijing polo seu papel para impulsar a fin da guerra e pola asistencia humanitaria remitida a Kíiv. A voceira do Ministerio de Asuntos Exteriores ruso, Maria Zajarova, afirmou que “tomamos nota” dos esforzos da China para “estabelecer un proceso de negociación”, porén, acusou Kíiv de rexeitar “calquera iniciativa sensata encamiñada á solución política e diplomática” a través de “exixencias non realistas” e normas como a prohibición legal de negociar co líder ruso Vladimir Putin, amais, advertiu que os chamamentos á paz “dificilmente poden ser percibidos axeitadamente polos monicreques controlados desde Washington”. O titular de Asuntos Exteriores, Sergei Lavrov, reclamou en TASS antes de coñecerse a conversa entre Xi e Zelenski aos países occidentais que declaren “que obxectivos perseguen” en Ucraína, e cualificou de “esquizofrénica” a idea difundida polos membros da Organización do Tratado do Atlántico Norte (OTAN) tras coñecerse a proposta de paz chinesa de que pedirán a Zelenski que acepte negociar despois dunha hipotética contraofensiva con éxito das tropas ucraínas, para o que continúan a armar o país, que recibiu case 70.000 millóns de euros en armamento. No que atinxe á Unión Europea, o Alto representante para a Política Exterior, Josep Borrell, cuestionou pouco antes do diálogo entre a China e Ucraína a proposta de paz do Estado asiático ou do Brasil, subliñando que “para que os esforzos de paz sexan críbeis e honestos tamén hai que falar con Kíiv”. O bloque comunitario segue a debater os detalles para implementar a proposta acordada en marzo de dedicar 2.000 millóns de euros a munición para as Forzas Armadas ucraínas, algo que Borrell considerou determinante para a contraofensiva, que foi atrasada varias semanas e que segundo algunhas fontes occidentais xa tería comezado, algo que rebaten os medios especializados pola falta de probas. Washington considera a conversa "algo bo" O voceiro do Consello de Seguridade Nacional dos Estados Unidos, John Kirby, destacou que a chamada é “algo bo”, aínda así, asegurou que “non creo que saibamos neste momento” se a conversa “conducirá a algún tipo de movemento, plan ou proposta de paz significativa”. O certo é que despois de negar nun primeiro momento a posibilidade de que a China formase parte da saída negociada ao conflito aludindo a súa falta de imparcialidade e a suposta intención chinesa de vender nalgún momento armas a Rusia, unha mensaxe que se comezou a transmitir pouco antes da presentación do plan de paz chinés no primeiro ano da invasión rusa, cada vez máis medios occidentais remarcan que os países da OTAN coinciden no papel chave de Beijing na resolución do enfrontamento. Ao respecto, e após ser forzada Ucraína pola alianza militar liderada polos Estados Unidos a non asinar un acordo de paz con Rusia nos primeiros compases da invasión, como revelou o ex primeiro ministro israelí Naftali Bennett, o paso por Beijing do presidente español, Pedro Sánchez, do francés, Emmanuel Macron, da líder da Comisión Europea, Ursula von der Leyen, e do Brasil, Lula da Silva, nas últimas semanas, unido á “enormemente relevante” chamada con Zelenski, refire Al Jazeera, incrementa as posibilidades de que o impulso chinés achegue o conflito a unha saída negociada. En risco o acordo humanitario para a exportación de gran polo mar Negro Gennady Gatilov, enviado de Rusia perante a Organización das Nacións Unidas (ONU), trasladou onte que “non se produciu ningún progreso real” sobre o acordo humanitario para a exportación de gran polo mar Negro, que expiraría o 18 de maio no caso de que non se efectúen novas prórrogas. Moscova reclamou nos últimos meses que se apliquen os apartados do acordo referidos á fin dos obstáculos ás exportacións de cereais e fertilizantes rusos xerados polas sancións dos membros da OTAN. Ao respecto, o secretario xeral da ONU, António Guterres, enviou unha carta ao presidente ruso, Vladimir Putin, na que propón “un camiño a seguir dirixido á mellora, extensión e expansión” do acordo para a exportación polo mar Negro, na que segundo fontes rusas debulla as súas xestións para conseguir o cumprimento íntegro do pacto. O ministro de Asuntos Exteriores ruso, Sergei Lavrov, admitiu os esforzos de Guterres, pero con “practicamente ningún resultado”, e criticou o interese dos Estados Unidos e a Unión Europea en beneficiarse do acordo humanitario, ademais de informar de que Putin está a estudar a súa resposta á misiva. As xestións do secretario xeral da ONU para que o pacto se cumpra na súa totalidade foron cuestionadas por Washington, como desvelou un dos documentos filtrados da Intelixencia dos Estados Unidos, que tras espiar a Guterres censuraron que estivera disposto a pedir a fin das sancións que frean a exportación de gran e fertilizantes rusos, o que para eles socava a súa campaña para responsabilizar Rusia "polas súas accións en Ucraína".