A Unión Europea aproba o comezo das negociacións para a adhesión de Ucraína e Moldova

O presidente do Consello Europeo, Charles Michel, confirmou hoxe, na primeira xornada da reunión do organismo, cuxa clausura está prevista hoxe, que foi ratificada a apertura de negociacións para a adhesión de Ucraína á Unión Europea (UE), que considerou “un poderoso sinal político” para que Kíiv sexa consciente de que “estamos á súa beira”, nunha decisión que considerou “importante para a credibilidade da UE”. Ao tempo, tamén comezarán as conversas para a entrada de Moldova, seguindo as recomendacións efectuadas en novembro pola Comisión Europea, mentres que no caso de Bosnia-Hercegovina foi ratificado o ditame do Executivo da UE, que as condicionou a que o Estado balcánico alcance “o grao necesario de cumprimento dos criterios de adhesión”, polo que as e os 27 líderes dos membros do bloque comunitario estudarán en marzo un informe sobre o avance nos requisitos. O presidente ucraíno, Volodimir Zelenski, subliñou que “é unha vitoria para Ucraína” e “para toda Europa". Durante unha intervención por videoconferencia no cumio, insistira en que “ninguén quere que se considere que Europa non é digna de confianza”, reiterando que “os acordos deben respectarse”. O certo é que a Unión Europea, onda os Estados Unidos, instigaron o golpe de Estado de extrema dereita de 2014 en Ucraína, que depuxo o presidente Viktor Yanukovich, que se negaba a asinar un acordo de asociación con Bruxelas que implicaba limitar os vínculos comerciais con Rusia. A UE comprometeuse a entregar máis de 77.000 millóns de euros a Kíiv desde o comezo da invasión rusa, que inclúe un paquete de 50.000 millóns de euros entre 2024 e 2027 que se negociaba no Consello á hora do feche desta edición. Durante a votación para aprobar o comezo do proceso de adhesión de Ucraína e Moldova, que precisaba de unanimidade entre os membros da UE, o primeiro ministro do Goberno de ultradereita en Hungría, Viktor Orbán, saíu da sala para evitar “participar nunha mala decisión”, sostivo. A cimeira comezou con atraso após diversas reunións da líder do Executivo da UE, Ursula von der Leyen, o presidente do Consello, o mandatario francés Emmanuel Macron, o chanceler alemán Olaf Scholz e a primeira ministra de extrema dereita italiana, Giorgia Meloni, co primeiro ministro húngaro para tratar de que aceptase o comezo das negociacións de adhesión e o desbloqueo dos 50.000 millóns de euros. Hungría avanza que bloqueará a entrada de Ucraína na UE 24 horas antes, a Comisión Europea deu luz verde á entrega de 10.200 millóns de euros a Hungría, parte dos máis de 30.000 millóns en fondos comunitarios conxelados, sostendo que responden á mellora da independencia xudicial no país. Con todo, antes do inicio da reunión, Orbán reafirmara que “a ampliación é un proceso baseado en méritos e legalmente detallado que ten condicións previas”, recalcando que tres dos sete requisitos marcados pola Comisión “non foron cumpridos”, polo que “non hai razón para negociar agora a entrada de Ucraína”, que cualificou en declaracións anteriores como “un dos países máis corruptos do mundo”. Ao anunciar en novembro que o Executivo da UE recomendaba iniciar as conversas de integración, von der Leyen defendeu que Ucraína puxo en marcha 90% das exixencias para a súa adhesión, cando cinco meses antes recoñecera que apenas cumprira dúas das sete, as reformas para a composición dos órganos xudiciais de alto nivel e as relacionadas cos medios de comunicación. En todo caso, o Sindicato Independente de Xornalistas Ucraínos denunciou que a reforma outorga a un órgano controlado polo presidente Zelenski a capacidade de censurar publicacións sen necesidade de xuízo previo, e antes -e despois- da invasión rusa xa foran fechados medios baixo distintos pretextos. Sobre o primeiro punto, o alcalde de Kíiv, Vitali Klitschko, acusou Zelenski dunha deriva autoritaria. Máis dunha decena de partidos políticos opositores e progresistas foron prohibidos. Sobre o papel, Orbán non era o único líder da UE contrario ao comezo das negociacións con Ucraína. Esta semana, o chanceler austríaco, Karl Nehammer, subliñou que o país “non aceptará negociacións sobre a adhesión de Ucraína nas condicións actuais”, facendo énfase en que non se produciron consultas previas da Comisión Europea cos Estados sobre esta cuestión. Janos Boka, titular de Exteriores, recalcara que até un terzo dos Estados membros tiñan dúbidas ao respecto, e Nehammer cuestionou que se lle dera prioridade ás negociacións con Ucraína por diante do diálogo con Bosnia-Hercegovina. A axuda a Ucraína está no nivel máis baixo desde o comezo da invasión rusa No caso de Moldova, a presidenta conservadora Maia Sandu está detrás do achegamento de Chisinau a Bruxelas, que estaría disposta a obviar a disputa fronteiriza coa independente de facto Transnistria, rachando coas exixencias a outros Estados candidatos de que resolvan as cuestións de lindes antes de poder acceder. Tamén en Moldova foi prohibido un partido opositor. Xa en Bosnia-Hercegovina, o cumprimento dos criterios de admisión dificúltase pola disfuncionalidade dun Estado que na forma actual foi creado polos Acordos de Dayton en 1995, que someten o país ao ditado dun Alto Representante proposto pola comisión de implementación dese pacto, e que sempre recaeu en representantes de Estados da UE. Amais de Austria, tamén Italia ou Eslovaquia intentaron condicionar a adhesión de Ucraína á aceptación da do país balcánico. En última instancia, o Consello Europeo tamén deu luz verde a considerar Xeorxia como país candidato a sumarse á UE. Conferencia anual do presidente ruso O presidente ruso, Vladimir Putin, acusou Zelenski nunha conferencia de prensa de catro horas na que atendeu as preguntas de medios de comunicación e cidadáns e cidadás rusas de enviar os seus soldados “ao exterminio” co apoio occidental, lembrando o fracaso da contraofensiva militar de Kíiv que comezou en xuño, e insistiu en que a negativa ucraína a negociar un acordo de paz obriga Moscova a “utilizar outras medidas, incluídas as militares”. A OTAN, consciente de que Ucraína tampouco gañará a guerra en 2024 Rusia reclama a “desnazificación” de Ucraína e rexeita o seu ingreso na Organización do Tratado do Atlántico Norte (OTAN), a alianza militar liderada polos Estados Unidos á que pertencen a maioría dos Estados da UE. No tocante á normalización de relacións cos Estados Unidos e o bloque comunitario, sostivo que “non foi Rusia” quen as estragou, abrindo a porta a restabelecelas con Washington “cando empecen a respectar outros países”. "Perdemos a credibilidade" Nunha intervención no Consello Europeo, o primeiro ministro irlandés, Leo Varadkar, incidiu en que “perdemos a credibilidade no Sur Global, que en realidade é a maior parte do mundo, debido ao que se percibe como unha dobre vara de medir, e francamente hai algo de verdade niso”, en referencia á posición do bloque comunitario sobre a agresión israelí á Faixa de Gaza. A axencia EFE trasladou que foi imposíbel chegar a un acordo para demandar un alto o fogo na cimeira.