Trump ameaza Hamás con "desatar o inferno" se non acepta o seu plan de paz

O presidente dos Estados Unidos, Donald Trump, endureceu esta sexta feira a súa mensaxe cara a Hamás, advertindo de que se non acepta o plan de paz presentado esta semana, a partir da segunda feira desencadearase "un inferno como nunca antes se viu".

O ultimato fixa como límite as 18 horas do domingo en Washington (00 horas da segunda feira na hora galega). Trump recalcou que a súa proposta, estruturada en 20 puntos, é a "última oportunidade" para pór fin á guerra en Gaza e abrir a porta a unha solución duradeira.

"Haberá paz en Oriente Próximo, dunha maneira ou doutra", asegurou o mandatario nunha mensaxe publicada en Truth Social, a súa rede social de referencia. O plan de Washington chega nun momento de máxima tensión tras os continuos bombardeos israelís e a crise humanitaria en Gaza.

Trump presentou o plan a comezos de semana, nun contexto marcado polas críticas internacionais a Israel. Entre os puntos do documento inclúense medidas sobre a apertura de corredores humanitarios, a liberación de reféns israelís e presos palestinos, e a creación dun Estado palestino "baixo condicións de seguridade".

Mentres, sobre o terreo, continúan as operacións militares israelís e as denuncias de organizacións internacionais de que a poboación de Gaza sofre unha situación límite de fame, destrución e bloqueos. A ameaza de Trump engade un novo elemento de presión nunha guerra que suma xa decenas de milleiros de vítimas.