O testemuño oferecido esta terza feira perante a Audiencia Nacional por Houli Chemlal, de 21 anos, confirmaría as teses que xa manexaba a equipa investigadora dos Mossos: o plano A da célula terrorista era un atentado en Barcelona de envergadura, con explosivos.
A explosión producida pola impericia dos terroristas no chalet de Alcanar frustrou os seus planos -ao chamar a atención dos servizos de emerxencia e bombeiros sobre o chalet- e obrigounos a mudar de planos. Foi entón cando decidiron realizar un atentado de menor escala, con furgoneta e armas brancas, segundo tería confesado Chemlal na súa declaración perante o xuíz Fernando Andreu.
Dos doce integrantes da célula jihadista oito foron abatidos por disparos dos Mossos e outros catro foron detidos. Estes son os que están a prestar declaración perante a Audiencia Nacional. Segundo fontes da Fiscalía consultadas por NacióDigital, os catro están asistidos por avogados de oficio e ningún deles precisa intérprete, sendo que se expresan perfeitamente en castelán.
Até o de agora, teñen permanecido incomunicados entre si -para non partillaren información- e esta situación de incomunicación é a que lles impede tamén ter acceso, no actual momento procesal, a un avogado de confianza.
A Fiscalía pede prisión incondicional e sen fianza para Chemlal, terrorista que resultou ferido na explosión de Alcanar e que foi detido no Hospital de Tortosa.
