Os sindicatos labregos cercan a capital francesa para exixir ao Goberno que actúe

Ás 14 horas de hoxe, aproximadamente 800 tractores, segundo as autoridades locais, lanzáronse a bloquear oito puntos de acceso á capital francesa, París, como parte do asedio indefinido da localidade na segunda semana de mobilizacións das organizacións agrarias, que afectan un terzo dos departamentos franceses, informaron as forzas de seguridade. Arnaud Rousseau, presidente da Federación Nacional de Sindicatos de Labregos (Fnsea), fixo fincapé en que ningunha rexión francesa quedará libre dos bloqueos de estradas, pouco antes da reunión prevista canda Arnaud Gaillot, de Xoves Agricultores, con Gabriel Attal, primeiro ministro francés. Ao tempo, explicou que “o noso obxectivo non é molestar ou arruinar a vida dos franceses”, senón “premer o Goberno para que atope rapidamente solucións á crise”. O certo é que “algúns manifestantes chegaron con reservas de alimentos e auga e tendas de campaña para permanecer nas barricadas se o Executivo non cede”, apuntou a axencia AP. Perante a convocatoria, que non evitou os bloqueos noutros puntos do Estado, o ministro de Interior, Gérald Darmanin, ordenou a mobilización de 15.000 membros das forzas de seguridade para impedir a entrada dos tractores en “París e as grandes cidades”, así como preparou “importantes medidas defensivas” para evitar o bloqueo dos aeroportos da urbe e do mercado de Rungis, un dos mercados de produtos frescos máis grandes do mundo, e no que hoxe pola mañá xa se despregaran unidades antidisturbios da Xendarmería. En todo caso, Darmanin indicou que “as forzas da orde deben actuar con gran moderación” e non intervir nos puntos de bloqueo, mais si “aseguralos”. A finais da pasada semana o Gabinete que encabeza Emmanuel Macron tratou de frear as protestas, que xa viviron dúas mortes tras o atropelo dunha labrega e da súa filla no bloqueo dunha estrada, anunciando unha exención fiscal ao combustíbel para uso agrícola -cuxos impostos intentou elevar-, a promesa de negociar coa Unión Europea (UE) a derrogación da obriga de dedicar 4% da terra a barbeito e acelerar os pagos da Política Agraria Común (PAC), da que o Estado francés é o principal beneficiario con 9.000 millóns de euros anuais. Porén, os principais sindicatos agrarios reclaman que o Executivo intensifique as súas accións para combater o que consideran “competencia desleal”, e que as mercadorías importadas teñan que cumprir as mesmas normas exixidas aos produtos franceses. Asemade, tamén cuestionan o acordo de libre comercio que se está a negociar entre o latinoamericano Mercado Común do Sur (Mercosur) e a UE e a entrada de produtos a baixo prezo procedentes de Ucraína, á que Bruxelas permitiu que vendera as súas mercadorías en territorio comunitario após a invasión rusa, polas menores restricións requiridas en relación á produción local. No que atinxe a Bruxelas, tamén critican a obriga de ter que usar terras cultivábeis para desenvolver infraestruturas agroecolóxicas. Todo isto no marco dunha suba do prezo da enerxía ou os fertilizantes. A secretaria xeral da progresista Confederación Labrega, Véronique Marchesseau, demandou unha “arbitraxe pública” para garantir que as e os traballadores do campo non vendan por debaixo dos custos de produción. Macron reunirase a vindeira quinta feira coa presidenta do Executivo da UE, Ursula von der Leyen, co fin de abordar a norma para manter unha porcentaxe de terra en barbeito, a importación de produtos de Ucraína e as negociacións co Mercosur para un tratado ao que “Francia oponse moi claramente”, reiterou Attal. Ademais, o ministro de Agricultura, Marc Fesneau, adiantou que “mañá [por hoxe] tomaranse novas medidas”. Un movemento "difuso" En paralelo, unha trintena de labregas e labregos bloquearon o acceso ao porto de La Pallice, en La Rochelle, no oeste francés, o que bloqueou a subministración desde os depósitos de petróleo do lugar. A radio France Bleu La Rochelle detallou que a meirande parte eran membros de Coordinación Rural, un dos sindicatos labregos, que exixiron formar parte da mesa de negociación e censuraron que a Fnsea capitalice as protestas. O xornal Le Monde sostén que “o movemento segue a ser difuso” e con múltiples variacións ao longo do territorio francés. Nos primeiros días de protestas múltiples camións doutros Estados foron baleirados polas e polos manifestantes nos bloqueos en distintos puntos do territorio francés, como nas proximidades da fronteira co Estado español ou en Bretaña. Críticas dos transportistas galegos O secretario xeral da Federación Galega de Transporte de Mercadorías (Fegatramer), Carlos García Cumplido, transmitiu hoxe que “nos sentimos desamparados” pola “violencia inadmisíbel” que están a padecer en territorio francés, con “camións rotos e condutores cansados ante a pasividade das autoridades”, debullando que nalgúns casos houbo expulsións de condutores dos camións, e instou o Estado español a actuar e garantir a “libre circulación” na UE.