O PP avanza no Estado español e Bildu supera o PNV

O Partido Popular (PP) presidido por Alberto Núñez Feixoo superou nos comicios municipais e en 12 territorios do Estado español do domingo as previsións do Centro de Investigacións Sociolóxicas, gañando en votos e edís as municipais e accedendo ao Goberno da maioría das comunidades autónomas co apoio do ultraespañolismo de Vox, entrementres, en Euskal Herria Bildu convértese en primeira forza e o PSOE obtén en terreo catalán a súa principal vitoria por riba de Junts e Esquerra Republicana de Catalunya (ERC), que fica, non obstante, á cabeza en edís. Dos 12 territorios onde se votaron novos Parlamentos (dous deles até o de agora liderados polo PP, nove polo PSOE e un polo Partido Rexionalista de Cantabria co PSOE no Goberno) os conservadores quedarán con oito, con maiorías absolutas na Rioxa e na Comunidade de Madrid, na que Isabel Díaz Ayuso repetirá na Presidencia tras continuar crecendo en apoios con respecto a procesos electorais anteriores. No caso de Cantabria, Aragón, Estremadura, Murcia, País Valencià e Illes Balears o PP tamén se fará co bastón de mando máis precisa Vox, cuxo principal representante, Santiago Abascal, ratificou onte que xa comezaron os contactos co PP, reiterando a súa intención de construír cos conservadores unha “grande alternativa” seguindo a liña marcada por Castela e León, onde comparten coalición de Goberno. No País Valencià, a desaparición de Izquierda Unida (IU) e Podemos do lexislativo e a baixada de dous escanos de Compromís impediu que a suba en representantes e votos do PSOE permitise a Ximo Puig reter o control do Gabinete, e outro tanto aconteceu nas Illes Balears, coas forzas soberanistas e o PSOE case repetindo o resultado de 2019, o que non abondou perante a caída da coalición progresista española, que quedou cun asento. En paralelo, en Melilla, lugar que protagonizou varias detencións nunha investigación por compra de votos, o PP logrou a maioría absoluta, á vez, en Ceuta precisará de Vox para gobernar. Pola contra o PSOE conservou pola mínima a maioría absoluta en Castela-A Mancha e o Executivo de Asturias, previo pacto nesta ocasión coa coalición entre IU, Más País, e Izquierda Asturiana, e mais coa candidatura de Podemos. O terceiro e último Goberno territorial que encabezará o PSOE nesta lexislatura será previsibelmente o de Nafarroa, cunha María Chivite que mantivo a súa representación, de 11 escanos, mais cun Bildu que incrementou a súa representación até 9 asentos co sorpaso a Geroa Bai, a coalición na que se integra o Partido Nacionalista Vasco (PNV), que ficou con 7. Contigo Zurekin acabou con 3. A primeira forza foi Unión del Pueblo Navarro con 15, insuficientes para unha alianza cos 3 deputados do PP e os 2 de Vox. Todo indica que no último territorio en liza, Canarias, volverá ao Goberno Coalición Canaria, que se aproveitaría do ascenso do PP e o retroceso do PSOE para alcanzar a maioría absoluta cos conservadores e a Agrupación Herreña Independiente. Coa confirmación dos resultados electorais, o Parlamento galego é o único órgano lexislativo territorial do Estado español no que a extrema dereita non ten presenza. Municipais Nos comicios locais a nivel estatal o PP rematou como primeira forza, gañando máis de 3.000 novas e novos edís até 23.412, e cun PSOE que após vencer en 2019 deixouse 1.500 edís e ficou como segunda forza con 20.784, máis de tres puntos por detrás dun PP que se fixo con 31.5% dos sufraxios. O ultraespañolismo de Vox consolídase en terceira posición a nivel de votos con 7,2%, porén, fica quinto en número de edís (1.700), por detrás de Esquerra Republicana de Catalunya (2.903) e de Junts (2.683). O PP tamén minou a base do poder local do PSOE e gobernará en sete das oito cidades máis poboadas do Estado, en Madrid, Málaga e Murcia con maioría absoluta, e no que atinxe a València, Sevilla, Zaragoza e Palma precisará dunha alianza con Vox. Euskal Herria O principal fito dos comicios en Euskal Herria foi a vitoria de Bildu perante o PNV, que converte a organización dirixida por Arnaldo Otegi no primeiro grupo político vasco nestes momentos, tras facerse coa vitoria nas xuntas forais de Gipuzkoa e nas municipais en Gasteiz, así como quedar como primeiro partido progresista en Iruña, fronte a un PNV que quedou co resto de xuntas forais e con Bilbo e Donostia. Malia que en Euskadi o PNV se impuxo en votos con 31,7% por 29,2% de Bildu, esta última formación alcanzou o maior número de edís, 1.050, ao que hai que engadir 345 concelleiras e concelleiros en Nafarroa -300 máis que Geroa Bai-, onde gañaron en votos (21,3% por 6% de Geroa Bai), o que sumado aos anteriores resultados electorais en Iparralde, no Estado francés, pon a formación na primeira praza en Euskal Herria. ERC gaña en edís e o PSC en votos Nas municipais de Catalunya o gañador en votos foi o PSC con 23,7% das papeletas, por diante de Junts (18,36%) e ERC (17,3%) que, iso si, será a primeira forza en edís con 2.903 representantes nos Concellos a pesar de perder máis de 200 asentos. O partido do presidente catalán, Pere Aragonès, perdeu o Goberno municipal de Lleida e Tarragona, que pasan ao PSC, e logrou na capital, Barcelona, un resultado por baixo das expectativas que en todo caso lle permitirá ser determinante na formación do novo Gabinete que rexerá o municipio. O único certo en Barcelona (11 edís Junts, 10 PSC, 9 Barcelona en Comú, 5 ERC, 4 PP e 2 Vox) é que Ada Colau non repetirá como alcaldesa da cidade, tras manter o cargo hai catro anos co apoio de Ciudadanos e verse superada polo candidato do PSC, Jaume Collboni, por menos de 150 sufraxios. Derrota de Podemos e Ciudadanos As candidaturas Podemos-IU pasaron de 47 representantes nos lexislativos autonómicos que se votaron o domingo a 15, ficando fóra de Madrid, o País Valencià ou Canarias e non sendo capaz de entrar en Castela-A Mancha ou Cantabria, aspirando a formar parte dun Executivo territorial apenas en Nafarroa. Así e todo, peores foron os resultados de Ciudadanos, que non entrou en ningún dos lexislativos territoriais que se votaron e perdeu máis de 2.000 edís até 1,35% dos sufraxios, unha diminución de máis de sete puntos en relación aos comicios de 2019.