O primeiro ministro de Portugal, António Costa, lamentou onte a falla dunha posición conxunta dos países da UE sobre a vacina da AstraZeneca, defendeu o reforzo dos poderes da Axencia Europea do Medicamento (EMA) e avisou de que a vacinación non debe ser posta en dúbida, informou Lusa.
Costa explicou que Portugal, na súa calidade de país presidente de quenda da UE, convocou unha reunión con todos os ministros de Sanidade do bloque comunitario tras coñecerse na cuarta feira o informe da EMA sobre AstraZeneca. O obxectivo, estabelecer unha posición común. "Tenho muita pena que não tenha sido possível haver essa posição comum, porque isso reforçava a confiança de todos", sinalou.
Ademais, o presidente do Goberno portugués criticou a falla de competencias en Sanidade que da UE. "O que está a acontecer é um bom exemplo de como tínhamos toda a vantagem no sentido de integrar competências na União Europeia, porque a EMA dispõe de muito maior informação do que qualquer um dos Estados-membros. E quanto maior for a informação melhor é a qualidade da decisão a tomar", subliñou.
Neste sentido, manifestou que UE debe sacar "lições" do que está a pasar e que "importa reforçar as competências da EMA". "Caso contrário, então também não faz sentido a existência desta agência europeia, sobretudo se decide uma coisa e, depois, cada Estado-membro pode fazer o que quiser de forma diversa", reflexionou.
AstraZeneca en Francia
Por outra banda, Francia comunicou onte que inxectará unha segunda dose das vacinas de Pfizer ou Moderna aos pacientes menores de 55 anos que xa recibiron unha primeira dose de AstraZeneca, tras recomendar non inxectar esta a ese grupo de idade polos supostos riscos de sufrir trombos.
O ministro de Sanidade francés, Olivier Véran, declarou este venres na radio RTL que esa será a solución que adoptará a Alta Autoridade de Sanidade (HAS, nas siglas en francés), para a segunda dose das 500.000 persoas, a maioría sanitarios, desa faixa de idade vacinados con AstraZeneca.
Ese organismo, encargado de autorizar todos os medicamentos no país, suspendeu o pasado 19 de marzo as inxeccións coa vacina británico-sueca aos menores de 55 anos, tras a aparición dalgúns casos de trombos en persoas que a recibiron en Europa.
Trombos e Janssen
Ademais, a EMA confirmou onte que investiga o risco de desenvolver tromboembolismos coa vacina contra a Covid-19 de Janssen, filial da estadounidense Johnson&Johnson, ao recibir un "sinal de seguridade" relacionado con catro casos graves de coagulación sanguínea tras a vacinación con este preparado.
Segundo confirmou a EMA, despois das reunións que mantivo o seu comité de seguridade (PRAC, nas siglas en inglés) desde a pasado terza feira até onte, os seus expertos iniciaron unha "revisión" de casos para investigar eventos tromboembólicos ou de formación de coágulos sanguíneos inusuais en persoas vacinadas con Janssen.
A EMA analiza datos sobre catro casos graves de coagulación sanguínea inusual con baixas plaquetas en pacientes que recibiran previamente este antíxeno, un deles durante o ensaio clínico e tres durante o uso de Janssen nos Estados Unidos, dos que, un resultou no falecemento da persoa vacinada.
