Trump, imputado por 34 delitos de falsificación de rexistros comerciais

O ex presidente dos Estados Unidos entre 2017 e 2021, Donald Trump, terá que enfrontar até 34 cargos por delitos relacionados coa falsificación de documentos comerciais, cargos que lle foron lidos esta terza feira despois de entregarse á Xustiza de Nova York, que o imputou a semana pasada. As falsificacións documentais están consideradas en Nova York como unha falta, mais no caso de que encubran ou sirvan para cometer outro crime poden ser elevadas á categoría de delito, iso si, no nivel máis baixo dos cinco graos que recolle o Código Penal estatal, e que implica desde un até catro anos de prisión. Neste caso, as acusacións fan alusión aos pagos xestionados por Trump á actriz porno Stormy Daniels e á modelo Karen McDougal, segundo declararon para silencialas por encontros sexuais con Trump cando xa estaba casado, o que é negado polo ex presidente. A chegada do ex mandatario ao Tribunal Penal de Manhattan decorreu entre numerosas protestas, tanto a favor como en contra da acusación contra Trump, que ao enfrontarse chegaron a provocar unha escaramuza mais que non derivou en choques máis graves no contexto dun amplo dispositivo de seguridade do que formaron parte arredor de 35.000 axentes da Policía municipal, coa contorna do Tribunal e da Torre Trump cercada por barricadas erixidas polas forzas de seguridade. Donald Trump, un suborno e unha actriz porno: por que é o primeiro ex presidente imputado con cargos penais? En paralelo, tamén se rexistraron choques entre os seguidores de Trump e a Policía, que tratou de manter separadas as dúas mobilizacións entre as queixas da poboación, que censurou que “a xente normal non poida achegarse á área que rodea o xulgado”, sinalou o veciño Maverick Stow en declaracións recollidas polo New York Post. Nas manifestacións a favor de Trump participaron varios lexisladores de extrema dereita do Partido Republicano como George Santos, que cuestionou “onde está a acusación de Hunter Biden [fillo do presidente dos Estados Unidos Joe Biden] após dous anos desde a computadora portátil chea dun tesouro oculto do crime?”, en referencia ás investigacións por casos como a relación de Biden cunha empresa ucraína acusada de corrupción. Aliás, insistiu en que a acusación “abarata o sistema xudicial, e iso non é bo para os Estados Unidos”. Perante a previsión da chegada de milleiros de persoas procedentes doutros Estados para as protestas, o alcalde neoiorquino, Eric Adams, trasladou que “a nosa mensaxe é clara e simple: Contrólate”, apuntando que a cidade “non é un patio de recreo para a ira fóra de lugar”. Barricadas en Nova York para a entrega á Xustiza de Donald Trump Declárase inocente Despois de entregarse no xulgado, Trump foi procesado e enfrontou a lectura de cargos antes de declararse como non culpábel, mentres que Joe Tacopina, do seu equipo legal, defendeu que “non creo que este caso vaia ver un xurado” e reiterou que Trump é “forte e está listo para actuar”, amais de descartar que acepte un acordo de culpabilidade incluso nos cargos de menor gravidade. Pola súa parte, Trump reclamou que o xuízo fose trasladado desde Manhattan á xurisdición de Staten Island por mor de que considera que non recibirá un trato xusto por parte dunhas institucións con tendencia máis liberal que as de Staten Island, na mesma cidade, mais coa diferenza de que nesta última demarcación impúxose en votos Trump nas presidenciais de 2020. Así e todo, o ex fiscal federal Ron Filipkowski explicou que a petición “probabelmente non vaia a ningunha parte” polo amplo coñecemento entre a poboación estadounidense do litixio e as emocións que xera. “Onde pode ir? Alaska? Todo o mundo sabe sobre este caso”, resolveu. Arredor dun potencial xuízo, a profesora de Dereito e Filosofía da Universidade de Pensilvania, Claire Finkelstein, debullou que “existe unha posibilidade moi clara de que o xuíz poña a Donald Trump baixo unha orde de silencio”, o que lle prohibiría facer declaracións sobre o caso e implicaría que se a viola podería “ir ao cárcere por desacato ao tribunal”, polo que tería o efecto de "acelerar a tensión en torno ao caso". Esta posibilidade foi rexeitada polos republicanos na Xustiza e na Cámara de Representantes, que salientaron que “pór restricións á capacidade de Trump para discutir o seu maltrato a mans deste fiscal con motivacións políticas só demostraría aínda máis o uso do sistema de Xustiza en Nova York como unha arma”. Á vez, o xuíz do caso, Juan Merchan, aceptou a petición da defensa de vetar a cobertura audiovisual na lectura de cargos, o que non impide que “o ex presidente e os seus axudantes estean a abrazar o circo mediático”, asegura AP. Nese sentido, o propio Trump destacou que recadou máis de 7 millóns de euros para sufragar a súa defensa desde que se fixo pública a súa imputación a finais da pasada semana, acusando os “demócratas radicais de esquerda” dunha persecución política para interferir nas súas opcións de ser candidato nos comicios de 2024 e atacando tamén o fiscal do caso, Alvin Bragg, do Partido Demócrata, ao que acusa de filtrar á prensa os cargos polos que foi imputado antes de entregarse. De feito, parte da despregadura policial na cidade débese ás múltiples ameazas de morte recibidas por Bragg. O xuízo, "combustíbel" para a campaña de 2024 No que atinxe á campaña electoral de 2024 e tendo en conta que a lexislación estadounidense non impide que Trump se presente ás eleccións incluso sendo condenado, o ex asesor de Seguridade Nacional John Bolton transmitiu a preocupación polo posíbel impulso á campaña de Trump, recalcando que a “percepción de que este xuízo ten motivacións políticas é moi forte dentro do Partido Republicano e produce, segundo as enquisas de opinión, un aumento no apoio a Trump”. “Creo que o resultado potencial se Trump é absolto sería combustíbel para a súa campaña presidencial”, concluíu Bolton. A esta advertencia sumouse o ex asesor principal da Casa Branca durante o mandato de Bill Clinton (1993-2001), Sidney Blumenthal, que puxo o foco en The Guardian en que “cada acusación fará a Trump máis forte e os republicanos máis salvaxes”, ratificando que os “axentes do poder da dereita saben que o monstro que crearon agora está realmente fóra de control”. Armas sen licencia O principal rival de Trump entre os republicanos, Ron DeSantis, o gobernador de Florida, lanzou despois da súa caída nas enquisas unha lei que permite levar armas ocultas sen licencia, formación ou consulta de antecedentes.