O vicesecretario xeral da OTAN, Mircea Geoana, declarou que o gasto en defensa da Alianza Atlántica terá "o maior incremento en décadas" este ano. "2023 será o noveno ano consecutivo de aumentos do gasto de defensa entre os aliados europeos e Canadá", dixo Geoana durante unha sesión da Asemblea da OTAN. "Esperamos un incremento real de 8,3%, o maior incremento en décadas", agregou o vicesecretario xeral.
Segundo Geoana, o conflito ucraíno ameaza tamén a seguridade en Europa. Desta maneira, asegurou que a OTAN está centrada en aumentar as reservas de municións e equipos, "enviando unha forte mensaxe de demanda á industria para que poidan producir o que Europa necesita", coa finalidade de "garantir a súa propia seguridade e apoiar Ucraína a longo prazo".
Dinamarca
Así mesmo, durante a sesión plenaria, a primeira ministra danesa, Mette Frederiksen, anunciou que Dinamarca está a traballar para ampliar a coalición de Estados dispostos a fornecer cazas F-16 a Ucraína.
Pola súa parte, o presidente de Ucraína, Volodimir Zelenski, mostrou esta terza feira o seu optimismo tras reunirse co seu homólogo romanés, Klaus Iohannis, en Bucarest, no que respecta ás entregas de munición e defensa aéreas, nun momento no que Kíiv e os seus socios insisten en que non está en risco a subministración de armamento.
"Estou agradecido por todos os paquetes de apoio proporcionados por Romanía e polo que discutimos hoxe [por esta terza feira], haberá boas novas sobre artillaría e defensa aérea", remarcou.
Zelenski tamén confirmou que Romanía levantará un centro de formación para pilotos ucraínos no manexo dos cazas F-16 aos que aspira ter acceso Kíiv.
