Oposición venezolana: crónica dunha fraude anunciada

O 22 de outubro realizáronse en Venezuela as eleccións primarias para elixir o candidato da oposición que se vai enfrontar a Nicolás Maduro nas eleccións presidenciais de 2024. O camiño das presidenciais opositoras quedou inzado de cadáveres políticos, entre eles o de Henrique Capriles Radonsky que, dentro da amálgama da oposición, leva anos enfrontado á vía violenta de Leopoldo López, fomentada e financiada por Estados Unidos. López hoxe está "exiliado" no barrio de Salamanca, en Madrid. Maria Corina Machado forma parte desa oposición violenta que, dende a chegada ao poder de Hugo Chávez, tentou arredalo da presidencia por infinitas vías, todas coa inestimábel colaboración e axuda material e financeira de Estados Unidos, axudas que van dende a creación de estados de opinión nos media internacionais artellados dende laboratorios mediáticos estadounidenses, nos que se presenta o Goberno venezolano cos epítetos de "autoritario", "réxime", "ditadura", ata o fomento da violencia nas rúas e a detención de conspiradores e inimigos do Goberno, coa intención de presentalos como "perseguidos políticos" cuxos dereitos humanos son violados polas "leis dun Estado autoritario". Colaboradora necesaria Outra das vías utilizadas por Estados Unidos coa colaboración necesaria de María Corina Machado, como instrumento e cara visíbel, é a creación de "movementos políticos apolíticos", disfrazados de movementos cidadáns ou organizacións non gobernamentais financiadas polo servizo secreto estadounidense baixo o nome Fundación Nacional para a Democracia (NED, polas súas siglas en inglés), cun orzamento anual de 30 millóns de dólares. Baixo o argumento de "promover a democracia e os valores occidentais" o que procuran é a desestabilización de gobernos non submisos aos intereses estadounidenses. O golpe de Estado de abril de 2002, liderado polo empresario Pedro Carmona Estanga, e o posterior decreto que derrogaba todo o feito polo goberno revolucionario bolivariano, estaba asinado por Leopoldo López e por María Corina Machado quen, tres anos máis tarde, en 2005, artellaba o movemento Súmate e era recibida na Casa Branca polo presidente George Bush. A vía violenta de Leopoldo López e o fraudulento goberno tinxido de "lexitimidade" de Juan Guaidó afundíronse, entre outros factores, pola avidez dos opositores, que tentaron repartirse o botín dos bens estatais venezolanos no estranxeiro, e que acabou moitas veces en denuncias mutuas como as de Humberto Calderon Berti (ex ministro de petróleo con Carlos Andrés Pérez e ex candidato presidencial opositor) contra Leopoldo López pola corrupción na empresa colombo-venezuelana de fertilizantes Monómeros. A farsa das primarias Buscan acabar cun Goberno que non é do agrado dos EUA, da UE nin dos representantes dos seus intereses en Venezuela A derradeira opción opositora, branqueada polo tempo, foi a farsa das eleccións primarias opositoras nas que María Corina Machado gañou de xeito indiscutíbel. Pero unha denuncia do candidato presidencial José Brito ante o Tribunal Supremo de Xustiza resultou nunha posterior sentenza da Sala Electoral que anulaba as distintas fases do proceso de primarias e recordaba que María Corina Machado está inhabilitada politicamente durante 15 anos. A oposición alega que as inhabilitacións políticas da Contraloría son represalias políticas para impedir a libre participación da oposición ante o temor do chavismo de perder as eleccións. Alega que as razóns da inhabilitación de Machado van dende a acusación de complicidade con Juan Guaidó en tramas de corrupción relacionadas coa filial petroleira estatal Citgo e a petroquímica Monómeros até o apoio das sancións estadounidenses ao país e a incautación de fondos soberanos en Estados Unidos e na Unión Europea dos que se serviu a oposición para estrangular economicamente o país e fomentar un embargo internacional que incrementa a carencia de medicinas, comida e insumos básicos para a poboación. Todo isto coa única finalidade de acabar cun goberno elixido democraticamente que non é do agrado de Estados Unidos, da Unión Europea nin dos representantes dos seus intereses en Venezuela. María Corina Machado alega que ningunha das acusacións anteriores está probada; porén, as súas declaracións públicas ao longo do tempo, a súa sinatura no decreto de golpe de Estado de Pedro Carmona Estanga, a opacidade no financiamento do seu proxecto político e o seu recibimento na Casa Branca por parte do presidente George Walker Bush, malia non ter ningún cargo político, desdín as súas alegacións, que lembran o dito venezolano: "Ellos nunca se acuerdan de nada".