10.812 palestinas e palestinos foron asasinados polos ataques israelís desde o comezo da agresión do 7 de outubro contra a Faixa de Gaza, 4.412 deles crianzas, informou hoxe o Ministerio de Saúde do territorio palestino.
Philippe Lazzarini, comisionado xeral da Axencia da Organización das Nacións Unidas (ONU) para os refuxiados palestinos, afirmou que o organismo “nunca rexistrou tantas mortes en tan pouco tempo durante un conflito”.
Unha pausa humanitaria "cínica e cruel"
Mentres millóns de persoas se manifestaron nas últimas semanas no mundo a favor de Palestina e persoas expertas da ONU denuncian que Israel está a cometer unha limpeza étnica e un xenocidio, os Estados Unidos seguen a negarse a reclamar un alto o fogo, e hoxe anunciaron un acordo con Israel para pausas humanitarias de catro horas diarias en Gaza, que os sionistas non confirmaron.
A relatora da ONU para Palestina, Francesca Albanese, cualificou de “cínica e cruel” esa linguaxe, instando a demandar un alto o fogo o “único actor con influencia que poder deter Israel”, insistindo en que o dereito de defensa non se pode aplicar “contra o pobo que ocupan”.
Hipocrisía occidental
O líder turco, Recep Tayyip Erdogan, criticou que, “aínda que eles sempre falan de dereitos humanos”, “os países occidentais simplemente se manteñen á marxe mentres Israel continúa este masacre”, cun “fanatismo que lexitima incluso o asasinato de crianzas”.
Aínda que a Comisión Europea replica a posición de Washington, as fendas na Unión Europea neste sentido son cada vez máis visíbeis. O presidente francés, Emmanuel Macron, apuntou que “temos que traballar para lograr un alto o fogo” e Bélxica trasladou que está a considerar recoñecer o Estado de Palestina.