A xeopolítica mundial e o papa Francisco

Hai apenas un mes fixen unha visita ao Vaticano convidado pola Academia de Ciencia do Vaticano para unha conferencia que convocou o papa Francisco titulada Colonialismo, descolonización e neocolonialismo. Tiven o privilexio de quedar no Domo de Santa Marta durante oito días, onde reside o papa Francisco. Compartín varios almorzos, comidas e ceas co Papa. Trátase da primeira conferencia anti-imperialista organizada polo Vaticano. A conferencia estaba composta por xuíces, intelectuais e académicos africanos e latinoamericanos. É dicir, que ademais do carácter anti-imperialista da conferencia, a mesma estaba organizada como un diálogo Sur-Sur. Se alguén me dixese hai apenas dous anos que o Vaticano organizaría unha conferencia como esta, reaccionaría en ton de burla. Pero co papa Francisco todo é posíbel. Nos últimos anos, o papa Francisco fixo críticas ao imperialismo, colonialismo, capitalismo, xenofobia, racismo, homofobia, sexismo, ecoloxicidio, fascismo, etc. O seu compromiso coa xustiza social levouno a confrontar múltiples opresións das cales a propia institución da Igrexa foi non só cómplice, senón un actor central durante séculos. Os pronunciamentos do Papa escandalizaron máis dunha seita no Vaticano. Máis recentemente o ultra-dereitista Opus Dei foi expulsado do Vaticano. Algo sen precedentes na historia contemporánea onde o Vaticano sempre foi un aliado dos poderosos. A teoloxía de dominación da cristiandade está a ser disputada pola teoloxía de liberación do cristianismo. O papa Francisco é un fillo da teoloxía de liberación latinoamericana. A loita contra o Deus dos opresores e explotadores que se representa como un home branco europeo de maior idade cunha barba branca que desde unha nube vixía e castiga está a ser substituído por un Deus misericordioso e xusto que se opón a todas as opresións existentes e que loita pola liberación dos condenados da terra en contra da explotación e dominación que sofren. Loita contra a pobreza A loita contra a pobreza do papa Francisco deixou de ser, como cos Papas previos, unha crítica moral superficial e transformouse nun chamado a realizar transformacións estruturais. A mesma semana da nosa visita, o Vaticano fixo unha declaración contra a Doutrina do Descubrimento e condenou todas as bulas papais do século XVI que a xustificaron. Estes cambios constitúen un terremoto xeopolítico sen precedentes. Mentres o Vaticano estivo por séculos defendendo os poderosos e opresores, o Vaticano do papa Francisco toma partido polos humildes e os oprimidos. Mentres o Vaticano se posicionaba cos imperialismos occidentais contra os pobos, o Vaticano do papa Francisco critica e distánciase institucionalmente das guerras imperialistas no Medio Oriente e máis recentemente en Ucraína. As presións da OTAN foron brutais pero a resistencia do papa Francisco puido máis. O Vaticano brilla pola súa ausencia no 'combo' dos aliados incondicionais á OTAN e ao réxime nazi ucraíno A guerra de Estados Unidos e a OTAN contra Rusia vía Ucraína pediu lealdade a todas as elites europeas. As presións foron enormes. O Vaticano brilla pola súa ausencia no combo dos aliados incondicionais á OTAN e ao réxime nazi ucraíno. Isto ten os imperios europeos e a OTAN moi molestos. Até o de agora acudiron a apremar os líderes que non se aliñan coa OTAN. Acoden á chantaxe, a presións financeiras, a facerlle publicidade en contra para que perdan eleccións, e até ao terrorismo de Estado cando Estados Unidos e Noruega voaron o Nord Stream 2 no mar Báltico para que Alemaña non puidese pactar con Rusia a continuación da venda do gas ruso. Así están as cousas. Pregúntome todos os días se o Papa corre perigo O último é que se publicaron informes secretos que mostran que Estados Unidos sabe que a guerra en Ucraína téñena perdida a pesar de que en público din o contrario. Eses documentos secretos pasaron a información pública e puxo o pobo estadounidense a protestar os gastos billonarios en que incorreu o fisco na guerra de Ucraína. O imperio estadounidense opera cunha lóxica mafiosa. A quen se lle enfronte destrúeno. Eles saben moi ben que un Papa comprometido coa xustiza social e o anti-imperialismo no Vaticano fai unha gran diferenza cunha parte da opinión pública mundial. Corre perigo o papa Francisco? É unha pregunta que me fago todos os días.