“Eugenio, hai que estar enriba do de hoxe para facer moito ruído... Moita posta en escena da UIP, etc. Que Fiti vaia avisándote”. “Mañá a prensa catalá vai a por todas. O xuíz cabrearase. Que non nos pille por sorpresa”.
Estas foron mensaxes que Martínez dirixiu a Pino na primeira hora da mañá do 27 de outubro de 2015, cando a Audiencia Nacional ordenara á Policía rexistrar 15 domicilios e empresas da familia do ex presidente catalán Jordi Pujol.
As mensaxes, filtradas polo diario español El País esta terza feira, foron incorporadas ao sumario do caso Kitchen, sobre o operativo policial para espiar o ex tesoureiro Luis Bárcenas e ocultar as probas de financiamento ilegal do PP.
Entre outras manobras, trataron de atopar contas en Suíza de Convergència e de Xavier Trias e aproveitaron un desaloxamento de okupas en Barcelona para cargar contra Trias: “Interesa mover moito isto dos okupas en Barcelona... especialmente o aluguer que lles pagaba Trias cando era alcalde. Quen nos pode enviar unha copia rápida ao respecto? E sobre okupas e Colau. Pedinlle a Enrique tamén”, escribiulle en maio de 2016 o secretario de Seguridade, nomeado polo Goberno do PP, ao entón xefe da Policía española.
“Non te preocupes, agora mesmo me poño (...) Xa estiven co notario. Irá denunciar ás 19 e ofrecémoslle un varrido e un contacto”, responde o xefe da Policía. “Todo o que teñamos de anarquismo é interesante... e de okupas”, retruca o secretario de Seguridade.
As mensaxes filtradas de xefes do Interior e de mandos policiais entre 2015 e 2019 poñen de manifesto a estratexia do Ministerio, na época en que gobernaba Mariano Raxoi, para investigar Podemos e o independentismo. Unha investigación que, na meirande parte dos casos, levábase a cabo sen respaldo xudicial.
Irán, Venezuela e Podemos
En relación a Podemos, uns días despois das eleccións nas que o partido morado obtivo 69 escanos, difundiuse un informe non atribuído á Policía pero que, segundo as mensaxes filtradas, distribuíuse desde o Ministerio do Interior.O citado documento sinalaba que o Goberno do Irán financiara da carreira política de Pablo Iglesias. Pino apuntaba entón: “É necesario, segundo as nosas fontes, que se ha de darse á prensa, por interese da oposición venezolana, que sexa a El Mundo ou El País e por unha plataforma mediática e televisiva. Esíxeno para seguir colaborando”. Martínez responde: “Por iso non haberá problema ningún. Descoida. A cuestión é que teño que despachar o asunto con calma co ministro”.
“Xefe, están ofrecéndome a conta de Errejón. Pero coa condición falada, que saia nun dos xornais”, dille o xefe da Policía ao secretario de Seguridade noutra conversa. Este último contesta: “Iso non será un problema”. Dous días despois, Pino escribe a Martínez, “As probas realizadas no lugar —Prisa— deron resultado negativo”.
![Sira Rego é ministra con Sumar. [Imaxe: Alberto Ortega / Europa Press]](/asset/zoomcrop,480,270,center,center/media/nosdiario/images/2024/05/01/2024050122045973661.jpg)
