Líderes africanos presentan a súa proposta de paz a Zelenski antes de reunirse con Putin

A delegación africana que impulsa unha proposta de paz para acabar coa guerra en Ucraína chegou a sexta feira á capital do país, Kíiv, para reunirse co presidente Volodimir Zelenski e presentarlle a iniciativa, un día antes de desprazarse a Rusia e facer o propio co mandatario Vladimir Putin. O presidente surafricano, Cyril Ramaphosa, encabezou a comitiva, na que se integraron os seus homólogos de Senegal, Macky Sall, Comores, Azali Assoumani, Zambia, Hakainde Hichilema, e o primeiro ministro de Exipto, Mustafa Madbuli. Asemade, incluíu dous representantes dos Executivos de Uganda -após o positivo por Covid do titular do Goberno Yoweri Museveni- e do Congo, tras cuestionar o mandatario Denis Sassou-Nguesso que as condicións actuais non permiten “un diálogo pacífico e construtivo” por mor de que o inicio da contraofensiva militar ucraína “presenta riscos para a sostibilidade do acordo de cereais [exportados polo mar Negro], que é moi importante para África”. Pouco despois da súa chegada, activáronse as alarmas en Kíiv e as autoridades ucraínas denunciaron unha vaga de ataques aéreos rusos. Nese sentido, Reuters reportou que se escoitaron cando menos dúas explosións, que o alcalde Vitali Klichko atribuíu aos mísiles dos sistemas de defensa aérea ucraínos. Antes de reunirse con Zelenski, os líderes africanos visitaron Bucha, unha localidade na periferia de Kíiv na que Ucraína acusa as tropas rusas de efectuar execucións, violacións e torturas, algo que Moscova nega. Un informe da Organización das Nacións Unidas (ONU) recolle que 73 civís foron asasinados en execucións sumarias polos militares rusos, sostendo que poderían constituír crimes de guerra. Proposta de paz africana En paralelo á visita, difundíronse fragmentos da iniciativa que desenvolveron os países de África implicados antes de debatela con Zelenski e Putin, que sinala que o obxectivo principal é “promover a importancia da paz e alentar as partes a acordar un proceso de negociación dirixido pola diplomacia”. Amais, fai fincapé en que “o conflito, así como as sancións impostas a Rusia polos principais socios comerciais do continente [africano], tiveron un efecto adverso nas economías e medios de vida africanos”. O documento fixa primeiro a “creación dunha contorna propicia para un alto o fogo”, antes de abordar un pacto para o cesamento de hostilidades ao que debería acompañar un proceso de negociación entre Rusia e os países occidentais, tras o fracaso previo á invasión rusa das conversas de Moscova con Washington e coa Organización do Tratado do Atlántico Norte (OTAN). Estas negociacións terían que incluír a despregadura de sistemas de armas de alcance medio, armas nucleares tácticas e sistemas de armas biolóxicas, que Rusia acusou os Estados Unidos de desenvolver en Ucraína. Na primeira fase, que busca “xerar confianza” entre as partes, a proposta contempla unha serie de medidas que a delegación africana podería propor, como un “acordo incondicional de cereais e fertilizantes”, a retirada de tropas rusas, a diminución das sancións coercitivas a Moscova, a volta a Rusia das armas nucleares tácticas que comezaron a ser instaladas en Belarús ou a suspensión da implementación da orde de arresto contra Putin emitida pola Corte Penal Internacional, que o acusa de deportación ilegal de crianzas nos territorios nos que decorre o conflito bélico. Nestes momentos, e malia a existencia de distintas iniciativas de paz, a procedente dos líderes africanos é a máis avanzada, após conversas con Kíiv e Moscova por parte da China e do Brasil arredor do final do conflito. O voceiro do Kremlin, Dmitri Peskov, subliñou que “o presidente Putin estaba e está aberto a calquera contacto para discutir posíbeis escenarios para resolver o problema ucraíno”. Kíiv tamén elaborou a súa propia proposta de paz, na que exixe que o primeiro paso sexa a retirada unilateral de Rusia do seu territorio. Porén, Moscova sostén que para negociar Ucraína debe recoñecer as “novas realidades” sobre o terreo, en referencia á adhesión a Rusia das zonas controladas polos militares rusos en catro rexións con posterioridade a uns referendos non recoñecidos pola ONU. Aliás, as autoridades rusas reiteraron que non aceptarán a entrada de Kíiv na OTAN, indicando que poría en risco a súa seguridade nacional tras a expansión da alianza militar liderada polos Estados Unidos cara ao leste de Europa despois de comprometerse en sentido contrario. Este punto xa foi abordado nas conversas coa alianza militar antes da invasión. Ao respecto de Washington, o secretario de Estado Antony Blinken pediu “maximizar o noso apoio a Ucraína”, que xa recibiu máis de 70.000 millóns de euros en armas por parte da OTAN, e puxo o foco en que calquera negociación tería que chegar tras a contraofensiva ucraína, posto que en caso de éxito “reforzaría a súa posición en calquera mesa de negociación”. Washington xa vetou nas primeiras semanas tras a invasión un alto o fogo entre Ucraína e Rusia. Nunha liña semellante, o Executivo da Unión Europea tamén se amosou en contra de que Kíiv e Moscova asinen un alto o fogo. A OTAN facilitará no futuro a entrada de Ucraína Cada vez "hai máis sinais de que todos poderán pórse de acordo", adiantou onte o ministro de Defensa alemán, Boris Pistorius, logo de múltiples debates no seo da alianza militar sobre o encaixe de Ucraína, que reclama a entrada na OTAN mais xa admitiu que é consciente de que esta opción é imposíbel antes da fin da guerra, con vistas á súa aprobación na cimeira da organización en xullo en Lituania. The Washington Post trasladou o apoio dos Estados Unidos a un plan que non presenta un calendario de adhesión mais elimina as barreiras á entrada de Kíiv unha vez que eventualmente reciba unha oferta da alianza militar para converterse en Estado membro. Contraofensiva Sobre a contraofensiva, que segundo medios internacionais determinará se a OTAN continúa armando Kíiv ou preme para que acepte comezar un proceso de negociación, Rusia recalcou que repeleu múltiples ataques das tropas ucraínas centrados na rexión de Donetsk, mentres que o Exército ucraíno definiu como “tensa” a situación na fronte, e destaca que se fixeron co control de sete asentamentos e 100 km cadrados nas case dúas semanas desde o comezo da contraofensiva.