A guerra en Ucraína impide o consenso na cimeira entre a UE e a Celac

32 de 33 países da Comunidade de Estados Latinoamericanos e Caribeños (Celac) e 27 da Unión Europea (UE) pactaron a terza feira unha declaración conxunta para pór punto e final á cimeira entre as dúas institucións que comezou a segunda feira, un consenso que impediu un país “debido ao seu desacordo cun parágrafo”, e que o presidente francés, Emmanuel Macron, identificou como Nicaragua. Dos 41 parágrafos que inclúe a declaración final, o principal foco de debate foi o referente á guerra en Ucraína, até o punto de que boa parte dos dous días de reunións estivo dedicada a intentar cadrar as posicións dos dous organismos e da pluralidade de posturas no seo da Celac. No continente americano só os Estados Unidos e o Canadá implementaron sancións coercitivas contra Rusia. Finalmente, ese apartado recolle a “profunda preocupación pola guerra en curso contra Ucraína”, detallando que causa “un inmenso sufrimento humano e está a exacerbar as fraxilidades existentes na economía global, restrinxindo o crecemento, aumentando a inflación, perturbando as cadeas de subministración, incrementando a inseguridade alimentaria e enerxética e aumentando os riscos para a estabilidade financeira”. Tamén inclúe o apoio “á necesidade dunha paz xusta e sostíbel” e a “todos os esforzos diplomáticos encamiñados a conseguir unha paz xusta e sostíbel de acordo coa Carta da Organización das Nacións Unidas (ONU)”, así como defende a iniciativa de exportación de grans polo mar Negro pactada por Moscova, Kíiv, Ancara e a ONU, e os esforzos do seu secretario xeral, António Guterres, para a súa extensión. O presidente colombiano, Gustavo Petro, incidiu en que existe “unha invasión imperial” a Ucraína, e cuestionou “como se chama a que houbo no Iraq, ou en Libia, ou en Siria? Por que esta ten esta reacción e as anteriores deste século non?”. Mentres, o líder brasileiro Lula da Silva criticou as sancións contra Rusia, ao "penalizar" as persoas máis vulnerábeis. Sobre o bloqueo dos Estados Unidos contra Cuba, o documento subliña a “oposición a leis e regulamentos con efecto extraterritorial”. Ademais, a UE non aceptou a proposta da Celac dun compromiso de reparacións dirixidas a reverter o legado do subdesenvolvemento provocado pola trata de escravos transatlántica. Tanto a UE como a Celac acordaron que esta cimeira, que non decorría desde había oito anos, se desenvolva no futuro cada dous. Mercosur Tras unha reunión con países latinoamericanos, a Comisión Europea explicou que pactaron reafirmar a determinación de que o acordo comercial entre a UE e o Mercado Común do Sur (Mercosur), que integran a Arxentina, o Brasil, o Uruguai e Paraguai, sexa aprobado a finais deste ano. En 2019 xa se alcanzou un acordo de asociación, mais que nunca foi ratificado. Así e todo, o bloque comunitario intensificou os contactos para reactivar o pacto e reducir a súa dependencia da China e dos Estados Unidos. Ademais, a terza feira asinouse un memorando de entendemento entre a UE e Chile para que o país americano proporcione materias primas como litio ou cobre a cambio de que Bruxelas impulse proxectos de transición enerxética no territorio chileno, un pacto semellante ao que un día antes asinou coa Arxentina. Represalia rusa polo ataque á ponte de Crimea As Forzas Armadas rusas lanzaron na madrugada de onte unha vaga de ataques aéreos contra instalacións nas que sostén que Ucraína preparaba actos terroristas nas rexións de Odesa e Mykolaiv. O Ministerio de Defensa ruso salientou que o ataque destruíu tamén centros de almacenamento de combustíbel que contiñan 70.000 toneladas e lugares de fabricación de drones mariños nas proximidades da cidade de Odesa, un día despois de que un ataque ucraíno con estes aparellos matara dous civís na ponte de Kerch, que une Crimea con Rusia e é utilizada pola cidadanía rusa nas súas vacacións. O voceiro do Kremlin, Dmitri Peskov, afirmou que os bombardeos rusos constituíron unha "represalia" polo ataque de Ucraína á ponte máis longa de Europa, nunha situación similar á de outubro de 2022, cando unha explosión matou cinco persoas na vía, desencadeando unha onda de ataques por parte dos militares rusos. Pola súa parte, Dmitro Kuleba, titular de Exteriores de Ucraína, destacou que “non toda ponte é [unha infraestrutura] civil por definición”, reiterando que o ataque dirixiuse contra unha infraestrutura militar por un suposto uso con fins bélicos, algo que o mandatario ruso, Vladimir Putin, descartou, asegurando que por esa ruta non se transportan equipos militares. Amais, Kíiv aseverou que derribou a maioría dos drones, así como mísiles, utilizados polas tropas rusas no ataque. En paralelo, Moscova difundiu que desmantelou un intento de ataque ucraíno contra Crimea con até 28 drones. Ao respecto da contraofensiva ucraína, iniciada hai un mes e medio, o xeneral ucraíno Alexander Sirski admitiu que “non vai tan rápido” como quixeran, e que malia a súa vontade de lograr avances inmediatos isto é “en realidade practicamente imposíbel”. Zelenski busca continuar co acordo do mar Negro sen Rusia No que atinxe á iniciativa de exportación de cereais ucraínos polo mar Negro, que Rusia se negou a prorrogar a segunda feira até que se cumpran os apartados do acordo referentes ás exportacións de grans e fertilizantes rusos, o presidente de Ucraína, Volodimir Zelenski, sinalou que as vendas de cereais por esta ruta deben continuar aínda que Moscova non forme parte do pacto, pouco antes de abordar a cuestión co secretario xeral da ONU, António Guterres. Nese sentido, Anatoli Antonov, embaixador ruso en Washington, criticou os Estados Unidos por converter a iniciativa humanitaria “nun proxecto comercial para enriquecer as compañías agrícolas occidentais”, ao tempo que Peskov contestaba a proposta de Zelenski remarcando os “riscos” de manter as operacións comerciais sen que Rusia forme parte do entendemento, indicando que os militares ucraínos utilizaron a zona para “fins de combate”. Asemade, informou de que Rusia está disposta a substituír gratuitamente a subministración de cereais procedentes de Ucraína que recibían os países máis empobrecidos, o que se debaterá cos países africanos o 27 e 28 de xullo durante o cumio entre Rusia e África.