Grupos de mulleres manifestáronse en Afganistán para reclamar os dereitos e liberdades perdidos desde a chegada dos talibán ao poder hai máis de ano e medio, un tempo no que segundo a ONU os radicais trataron de "borrar" da vida pública a metade da poboación, relegada de novo baixo a escusa da 'sharia' e lei islámica.
En Cabul, varias mulleres saíron ás rúas esta terza feira, Día Internacional da Muller Traballadora, para reclamar "traballo e educación", segundo Tolo News. Tamén a segunda feira houbo concentracións ás portas de universidades, coincidindo coa continuación dunhas clases que están agora reservadas a homes.
O ministro de Educación Superior, Neda Mohamad Nadim, defendeu que o veto feminino na universidade é só "unha decisión temporal" e explicou que todas as profesoras expulsadas seguen recibindo o seu soldo, nun intento de xustificar uns rumbos que se aplican tamén na educación secundaria ou mesmo no ámbito laboral.
No último trimestre de 2022, o nivel de emprego feminino descendeu 25%, fronte a 7% de caída no caso dos homes, segundo un estudo da Organización Internacional do Traballo (OIT), que advirte de que estas estatísticas non son puntuais senón que marcan unha tendencia.
Mulleres “borradas”
O secretario xeral da ONU, António Guterres, denunciou esta semana que as mulleres foron "borradas" directamente da vida pública afgá, recluídas de novo ao fogar e lonxe de calquera órgano de decisión. O réxime talibán non incorporou a ningunha muller, a pesar de que si se comprometeu a iso tras a saída das tropas internacionais.
Nacións Unidas denunciou unha emisión "case constante" de normas discriminatorias, ata o punto de que Afganistán é a día de hoxe "o país que máis reprime os dereitos das mulleres de todo o mundo", en palabras da responsábel da misión da ONU, Roza Otunbayeva.
"Confinar nas súas casas a metade da poboación nun dos países cunha maior crise humanitaria e económica é un acto colosal de autolesión. Condenará non só as mulleres e as nenas, senón tamén a todos os afgáns, á pobreza e a depender das axudas nas próximas xeracións", advertiu Otunbayeva.
A ONU estima que 13,8 millóns de mulleres e nenas necesitarán este ano axuda humanitaria en Afganistán, nun contexto especialmente complexo porque os talibán carecen de relacións diplomáticas con outros países e seguen sendo obxecto de sancións por parte dos principais bloques occidentais.