A ONU alerta de que farán falta tres séculos para acadar a igualdade de xénero

A "igualdade de xénero estase afastando cada vez máis, pola senda actual a 300 anos de distancia", criticou na madrugada de onte o secretario xeral da Organización das Nacións Unidas (ONU), António Guterres, na súa intervención diante da Comisión sobre a Condición Xurídica e Social da Muller, que decorre na sede da entidade en Nova York, Estados Unidos. Malia os avances á hora de fechar a fenda de xénero das últimas décadas, Guterres alertou de que o “patriarcado está a contraatacar”, “maltratando, ameazando e violando” os dereitos das mulleres, e defendeu que a ONU combate para manter e continuar a avanzar no camiño da igualdade de xénero, reclamando aos Estados que fomenten a “plena participación das mulleres e nenas no liderado en ciencia e tecnoloxía, desde os Gobernos até as salas de xuntas e aulas”. A cimeira, que se estenderá até o vindeiro 17 de marzo, busca enfoques para rematar coa fenda de xénero a nivel tecnolóxico coa participación de delegacións de 181 Gobernos do planeta e 8.700 integrantes da sociedade civil, que impulsarán case 900 actos nestas xornadas. Esta temática tamén centra a conmemoración hoxe do Día internacional da muller, no que a ONU demanda ás institucións que aceleren “os seus esforzos por conseguir un mundo dixital máis seguro, inclusivo e equitativo”. Mathu Joyini, que preside a Comisión, recalcou que a “discriminación de xénero é un problema sistémico”, e incidiu en que a transformación tecnolóxica permite “avances sen precedentes” na situación socioeconómica das mulleres, pero ao tempo xeran “profundos retos que poden perpetuar e profundar os patróns existentes de desigualdade” Os datos oficiais revelan que das 3.000 millóns de persoas no mundo que aínda non contan con acceso a internet a meirande parte son mulleres e crianzas nos países en vías de desenvolvemento, nestes Estados, apenas 19% das mulleres teñen acceso á rede, mentres que nos estudos de ciencias, tecnoloxías, enxeñaría e matemáticas nenas e mulleres alcanzan o terzo dos estudantes, unha diverxencia que aumenta en sectores como o da intelixencia artificial, onde supoñen un de cada cinco traballadores. A primeira ministra de Islandia, Katrín Jakobsdóttir, fixo fincapé en que “se os algoritmos son maioritariamente deseñados por homes” aumenta o risco de que as novas tecnoloxías impliquen “un mundo máis desigual”. Asemade, o secretario xeral da ONU apuntou que “a desinformación e a desinformación misóxina florecen nas plataformas das redes sociais”, e destacou que o obxectivo principal que persiguen é “silenciar as mulleres e sacalas da vida pública”. Obxectivos imposíbeis para 2030 En todo caso e con amplas variacións entre Estados, a situación das nenas e mulleres require avances que van moito máis aló do referente ás tecnoloxías. En 52 países do mundo as normas constitucionais non garanten a igualdade de xénero, en 49 non existen leis que protexan as mulleres da violencia das súas parellas, en 39 as fillas e os fillos non teñen os mesmos dereitos de herdanza e en 18 os maridos poden prohibir ás súas parellas que traballen. Os Obxectivos de Desenvolvemento Sostíbel da ONU, unha serie de indicadores de evolución social e económica mundial que terían que estar cumpridos ao final desta década, contemplan a fin “de todas as formas de discriminación contra todas as mulleres e nenas”, “eliminar todas as formas de violencia” e prácticas como o matrimonio infantil, participación plena das mulleres en todos os niveis públicos e privados ou acceso universal á saúde sexual e reprodutiva. Porén, coas cifras da propia institución na man cumprir eses obxectivos é practicamente imposíbel nese rango de tempo. Nos países onde se concentra a mutilación xenital feminina a proporción de vítimas é dunha de cada tres mulleres (200 millóns en total, en 2000 era unha de cada dúas mulleres), 13% da terra agrícola é propiedade de mulleres, 750 millóns de mulleres e nenas casaron antes dos 18 anos (37.000 casan cada día), e a metade das mulleres casadas ou nunha unión recoñecen que non poden decidir de forma libre sobre relacións sexuais, uso de anticonceptivos ou atención médica. En paralelo, no ámbito laboral gañan 24% menos que os homes facendo o mesmo traballo. No que atinxe á participación política, a media nos parlamentos estatais de todo o mundo é de 23,7% de mulleres deputadas. En tres cuartas partes dos lexislativos non superan 30% dos escanos e só 28 países están liderados por mulleres. A isto hai que engadir a ameaza da violencia, 30% das mulleres de 15 anos ou máis no planeta sufriu violencia física ou sexual por parte dunha parella ou violencia sexual por parte dunha persoa que non era a súa parella, 736 millóns de mulleres en total. A maioría dos casos de violencia proveñen de maridos ou compañeiros sentimentais. Máis de 640 millóns de mulleres sufriron esta lacra. Estímase que nos últimos 12 meses unha de cada sete mulleres a padeceu, algo que se eleva nas adolescentes de 15 a 19 anos até unha de cada catro mulleres. Ao ritmo actual, a previsión de ONU Mulleres é que a igualdade de xénero chegue no ano 2309. Mantense o número de feminicidios O avance “é marcadamente insuficiente”, conclúe a ONU, con relación á loita contra os feminicidios, a “manifestación máis brutal e extrema da continua violencia contra as mulleres e nenas, cuxas expresións se interconectan e superpoñen”. Os últimos datos consolidados presentados pola entidade, os de 2021, contabilizan 81.000 asasinatos machistas en todo o mundo, 56% cometidos por parellas ou membros da familia, un cada 11 minutos, “o que demostra que o fogar non é un lugar seguro para moitas delas”, asegura Sima Bahous, directora executiva de ONU Mulleres. Na última década, os datos de asasinatos machistas non diminuíron, aínda así, advirte que o volume dunha traxedia que considera universal pode ser moito maior polas incoherencias entre as definicións utilizadas en diferentes países, ademais, en 40% dos crimes mortais contra mulleres analizados non había información suficiente para consideralos feminicidios. A masculinidade tóxica e a violencia A evidencia amosa que as mulleres relacionadas con homes con comportamentos atribuídos á masculinidade tóxica teñen máis posibilidades de sufrir violencia por parte da súa parella, salientan os organismos internacionais, que resolven que a masculinidade tóxica xera violencia contra as mulleres. Nesa liña, insta a cuestionala e apoiar os homes e nenos na contorna para que asuman coidados, expresen as súas emocións e adopten actitudes que non se consideraban masculinas.