Francia desprega 2.000 axentes para conter as protestas en Nanterre contra a violencia policial

As protestas na localidade de Nanterre, un suburbio da capital francesa, París, que derivaron en enfrontamentos coas forzas de seguridade, deixaron na madrugada da terza á cuarta feira 31 persoas detidas, 24 membros das forzas de seguridade francesas con feridas leves e arredor de 40 vehículos queimados, informou o ministro de Interior, Gérald Darmanin. Estas mobilizacións xurdiron de forma espontánea após a indignación xerada ao longo do día polo asasinato de Naël M., de 17 anos e con orixe alxeriana -reportaron medios árabes-, por parte dun oficial de Policía que lle disparou cando trataba de afastarse dun control de tráfico nun coche alugado. Nun primeiro momento, as forzas policiais divulgaron que o disparo se produciu porque o adolescente intentou atropelar na súa fuxida un axente. Porén, un vídeo difundido nas redes sociais e cuxa veracidade foi confirmada por AFP, demostra que a versión policial constituía unha mentira. Nas imaxes vese dous oficiais da Policía pegados á xanela do condutor, Naël M; un fala con el mentres o outro o apunta directamente cunha arma, á vez, escoitase unha voz que sostén que “che van dar un balazo na cabeza”. Cando o condutor acende o vehículo e acelera -sen pór en perigo en ningún momento a integridade física dos axentes- o policía armado dispara contra o peito do adolescente, que se estrelou co coche poucos metros máis adiante, antes de que fora certificada a súa morte. Isto levou ás protestas fronte á sede da Policía e aos incidentes posteriores, coa queima de contedores e coches, así como de barricadas improvisadas, mentres que o lume tamén afectou unha escola primaria. Amais, foron lanzados petardos ás forzas de seguridade, que dispararon bombas lacrimóxenas, granadas de dispersión e balas de goma contra os manifestantes. Unha persoa denunciou feridas nun ollo polo uso deste último armamento. O alcalde de Nanterre, o comunista Patrick Jarry, reclamou “frear esta espiral de violencia que se volve contra os barrios” pola destrución de equipamento público. “Estamos a facernos dano”, resolveu. Así e todo, fixo fincapé en que as protestas e os enfrontamentos se produciron por mor de que “nestes barrios hai un sentimento compartido de que a Xustiza non é igual para todos, como non hai a mesma escola para todos nin o mesmo dereito ao traballo para todos, é todo iso o que alimenta esta frustración que se expresou durante a noite”. Medios locais prevían que as protestas, que na madrugada desta cuarta feira xa se comezaron a estender por suburbios veciños, continuaran a pasada noite, polo que Darmanin anunciou que até 2.000 policías e xendarmes estarían despregados en Nanterre. Pola súa parte, a nai do menor de idade asasinado convocou polas redes sociais unha marcha para exixir xustiza a quinta feira ás 14 horas diante da prefectura de Altos do Sena, fronte ao lugar onde Naël recibiu o disparo. Ao tempo, a cuarta desenvolvéronse manifestacións en cidades como Tolosa, Nantes ou Lille. O policía que asasinou o menor de idade, de 38 anos, está detido e foi interrogado pola Inspección Xeral da Policía Nacional tras a apertura dunha investigación contra el por homicidio voluntario cometido por unha persoa depositaria da autoridade pública. Tamén foi aberta outra investigación referida á vítima por saltarse o control de tráfico, algo criticado pola avogada da familia do falecido, Jennifer Cambla, que incidiu en que en Francia non se pode xulgar persoas mortas. Aliás, confirmou que amais da denuncia contra o atacante demandarán o seu compañeiro por “complicidade”, ao que engadirán unha querela por falsificación por difundir unha versión falsa do acontecido. No que atinxe ás outras dúas persoas que ían no vehículo, unha foi detida e liberada e a outra está sendo buscada, recolle AP. Asemade, Claire Hédon, defensora dos Dereitos de Francia -equivalente á Valedora do Pobo-, transmitiu que actuará de oficio neste caso. O presidente francés, Emmanuel Macron, trasladou que precisan “calma para que se faga xustiza”, e afirmou que “nada xustifica a morte dun mozo”, nunha situación que definiu como un drama “inexplicábel” e “inescusábel”, defendendo que as forzas de seguridade “están comprometidas con protexelos”. Máis alá da reacción comedida de Renacemento, a formación política de Macron, outra forza conservadora, Os Republicanos, arremeteu contra a vítima. “Se este mozo está morto, quen lembremos, conducía sen licencia e cuxo comportamento na estrada chamou a atención destes policías, é en primeiro lugar porque tratou de evadir o control”, subliñou o eurodeputado François-Xavier Bellamy. Nese sentido, Jordan Bardella, presidente de Reagrupamento Nacional, de extrema dereita, insistiu en que as forzas policiais “enfrontan unha presión cada vez maior e está claro que, particularmente nos suburbios de París, convertéronse en obxectivos”. O líder da oposición e da Nova Unión Popular Ecolóxica e Social, Jean-Luc Mélenchon, recalcou que “a pena de morte xa non existe en Francia”, e que “esta forza policial descontrolada desacredita a autoridade do Estado”, polo que ten que “ser revisada por completo”. En paralelo, a secretaria nacional dos Verdes, Marine Tondelier, cuestionou se “imos cara a unha americanización da Policía”, salientando que “o que vexo neste vídeo é un rapaz de 17 anos executado en Francia, en 2023, na vía pública, por un policía”, e ratificando que “antes de que se transmitira este vídeo vin un policía que mente, o seu colega que mente, o fiscal que mente e os medios de comunicación que menten”. Racismo Estas situacións non son novas en Francia. En 2022 13 persoas morreron por disparos das forzas de seguridade francesas en controis de tráfico. Neste exercicio a de Naël M. é xa a terceira. Unha análise de Reuters revela que a meirande parte das vítimas eran negras ou de orixe árabe. “Como nai de Nanterre, teño un sentimento de inseguridade polos nosos fillos”, recoñece Mornia Labssi, unha veciña da localidade e activista contra o racismo. Entidades en defensa dos dereitos humanos en Francia censuraron en múltiples ocasións o racismo sistémico nas forzas de seguridade francesas, algo que Macron negou. Unha morte sen xustificación O francés Le Monde entrevistou adestradores da Policía, ex axentes e oficiais de unidades especializadas, que corroboraron que non se trataba dunha situación de risco para a vida dos policías que xustificase o disparo, advertindo que o comportamento do agresor tamén puxo en risco o seu compañeiro. Isto súmase á "sensación de que a Policía ten unha cultura de impunidade que non se está a abordar", explica Al Jazeera, instando que a "ira se desbordara" en Nanterre.