Feixoo afronta unha investidura co transfuguismo como única opción

Alberto Núñez Feixoo, presidente do Partido Popular (PP), someterase desde esta terza feira a unha sesión de investidura no Congreso despois de ser designado candidato polo rei español, Felipe VI, e na que a única opción para conseguir os apoios que precisa é o transfuguismo de deputadas e deputados doutras opcións políticas, aos que o PP reiterou os chamamentos a romper filas. O transfuguismo non é un delito no Estado español, mais se detrás están ofrecementos de prebendas ou promesas que impliquen unha vantaxe económica si que constitúe un delito de suborno. As insinuacións por parte do PP neste sentido foron medrando en intensidade a medida que se achegaba a sesión de investidura. “Agardo que algúns reconsideren a súa posición”, indicara a secretaria xeral do PP, Cuca Gamarra, a pasada semana, antes de que o presidente de Andalucía e responsábel dos conservadores no territorio, Juan Manuel Moreno, afirmara que “ás veces chégase a extremos nos que os deputados deben rebelarse polos seus propios principios”. Ao ser interrogado sobre se o PP debería negociar cos escanos do PSOE, sostivo que “só podemos apelar á conciencia de Estado”. A “conciencia” tamén foi o núcleo da defensa do transfuguismo por parte do alcalde de Madrid, o seu correlixionario José Luis Martínez-Almeida, mais neste caso do que “mellor conveña ao interese xeral”. A voceira do PSOE e ministra de Educación, Pilar Alegría, definiu como “absolutamente vergonzoso” e un “despropósito” as chamadas do PP ao transfuguismo, recollendo as acusacións do presidente en funcións, Pedro Sánchez, contra Feixoo por alentalo. Porén, Gamarra aseverou que “nós non estamos a apelar ao transfuguismo”, e atribuíu as declaracións da cúpula do PP á denuncia “dunha gran fraude aos seus propios electores” polas negociacións do PSOE coas forzas soberanistas catalás para aprobar unha lei de amnistía a favor das persoas independentistas represaliadas pola organización dun referendo de autodeterminación en 2017 e os procesos relacionados, que centra o discurso conservador nas últimas semanas até o punto de desenvolver o domingo un acto de protesta contra esta posibilidade. O acto xuntou en Madrid 40.000 persoas segundo a Delegación do Goberno español e 60.000 para o PP, que mobilizou autobuses de distintas partes do Estado español. Jupol, até xuño sindicato maioritario da Policía española, de extrema dereita e próximo a Vox, arremeteu contra unha norma de amnistía, que cualificou como “un ataque directo á democracia, á Constitución e un desprezo á Policía” que “dinamita o actual Estado de dereito e a división de poderes” ao perdoar “un golpe de Estado”, en referencia ás votacións pola autodeterminación en Catalunya. Precisamente a ultraespañolista Vox cuestionou da man do seu secretario xeral, Ignacio Garriga, a amnistía, confiando en que o monarca se oporá. O certo é que mentres o PSOE e Sumar avanzan nas negociacións coas forzas soberanistas da Galiza, Catalunya e Euskadi, cuxo apoio é imprescindíbel para que Sánchez sexa reelixido e poida conformar unha coalición de Goberno coa formación que dirixe Yolanda Díaz, o PP conta cos mesmos votos a favor de Feixoo cos que contaba hai máis dun mes, cando Felipe VI o nomeou candidato á Presidencia, os 137 do PP, os 33 de Vox, un de Unión del Pueblo Navarro (UPN) e outro de Coalición Canaria (CC), catro por baixo da maioría absoluta na Cámara Baixa. Puigdemont exixe a amnistía para aceptar negociar a investidura de Sánchez ou Feixoo A sesión de investidura comeza ás 12 da mañá coa intervención de Feixoo sen límite de tempo, antes de que cada grupo parlamentario interveña até 30 minutos con 10 minutos adicionais para as réplicas. Despois do PSOE será a quenda de Vox, Sumar, Esquerra Republicana de Catalunya (ERC), Junts, EH Bildu, Partido Nacionalista Vasco (PNV) e o Grupo Mixto, integrado por Bloque Nacionalista Galego (BNG), UPN e CC, antes do fechamento dos conservadores, que decorrerá na cuarta feira. Unha vez finalizadas as intervencións dará inicio unha votación a viva voz, para a que Feixoo precisaría a maioría absoluta para ser elixido presidente. De fracasar, como apuntan todos os indicios, a sexta feira terá outra oportunidade nunha nova votación para a que requiriría máis votos a favor que en contra após unhas intervencións de menor duración. Asemade, o rexeitamento a Feixoo por parte do Congreso na primeira sesión de investidura no Estado español na que se poderá utilizar o galego, catalán e éuscaro, activaría a conta atrás cara a uns novos comicios estatais, que quedarán convocados para o 14 de xaneiro de 2024 no caso de que até o 27 de novembro non fose elixido un xefe de Goberno. Aínda así, arredor do 25 de outubro podería organizarse unha sesión de investidura con Sánchez xa como candidato, apunta a axencia Europa Press, dependendo das negociacións coas forzas soberanistas. O mandatario asegurou a segunda feira que a expresión nas urnas do 23 de xullo acabará por traducirse nun Executivo. "Fase técnica" da amnistía Ao respecto das conversas co PSOE e Sumar, a voceira de ERC, Raquel Sans, considerou feita a amnistía e desvelou que as negociacións están “na fase técnica” logo de intercambiar documentos, algo negado por PSOE e Junts e admitido por Sumar. En paralelo, incidiu en que tamén demandan para apoiar Sánchez a inclusión no acordo dun referendo de autodeterminación. “É o que pide a sociedade de Catalunya desde 2012”, subliñou. Ernest Urtasun, voceiro de Sumar, fixo fincapé nun dos aspectos defendidos polas forzas estatais en relación ao entendemento con Junts, que debería implicar unha renuncia á unilateralidade da autodeterminación catalá, e reiterou as palabras de Díaz insistindo en que a negociación xa supón non elixir “o camiño da unilateralidade”, ao tempo que Jaume Asens, que lidera as conversas con Junts, remarcou que o PSOE se moveu en dirección á amnistía “por oportunismo”. Euskadi reclama descentralización O lehendakari, Iñigo Urkullu (PNV), instou esta segunda feira a “buscar unha adecuación flexíbel do Poder Xudicial, e o seu Goberno, acorde cun Estado composto”, tras propor avanzar nun modelo territorial que desenvolva o autogoberno por medio dunha convención constitucional. Á vez, criticou a falta de renovación do Consello Xeral do Poder Xudicial, que en decembro fará o seu quinto aniversario en funcións polo bloqueo do PP. As forzas soberanistas vascas demandan abordar o modelo territorial para apoiar Sánchez, namentres o BNG exixe compromisos corroborábeis coa "axenda galega".