Berlín deixa entrever que aceptará enviar tanques alemáns a Kíiv
Despois de reunirse co secretario xeral da Organización do Tratado do Atlántico Norte (OTAN), Jens Stoltenberg, esta terza feira, o novo ministro de Defensa alemán, Boris Pistorius, incidiu en que “animei expresamente os países socios que contan con tanques Leopard listos para o despregue a que adestren as forzas ucraínas neses tanques”.
“Se se da un si, que posibelmente será o caso nos próximos días, tamén poderíamos actuar rapidamente”, destacou o ministro, xusto na xornada na que Polonia presentou a petición formal para enviar 14 tanques a Kíiv que anunciara a segunda feira. Asemade, Mariusz Blaszczak, ministro de Defensa polaco, instou Berlín a unirse ao grupo de países dispostos a enviar o modelo Leopard 2, o máis cobizado por Kíiv.
Así e todo, Pistorius reiterou que a decisión está en mans do chanceler, Olaf Scholz, e que a resolución final sería adoptada ao finalizar o inventario dos tanques das Forzas Armadas alemás. Mentres, o voceiro do Departamento de Estado estadounidense, Ned Price, adiantou que a decisión podería chegar nas “próximas horas”.
A pesar das declaracións alemás, o primeiro ministro de Varsovia, Mateusz Morawiecki, acusou Berlín de “atrasar e esquivar” a medida, “actuando dun xeito difícil de entender”. Amais, afirmou que pedirá á Bruxelas unha compensación polo envío.
A autorización para reexportar os tanques culminaría varias semanas de presión no seo da OTAN para que Alemaña -o terceiro país en envíos de armas a Ucraína após os Estados Unidos e o Reino Unido- aceptase a reexportación dos Leopard. O Executivo de Scholz dubidou até o de agora desta medida polas implicacións sobre a súa participación na guerra e entre críticas a Washington por negarse a enviar os tanques estadounidenses.
Pola súa parte, o voceiro do Kremlin, Dmitri Peskov, apuntou que “estes envíos non auguran nada bo para o futuro das relacións [con Alemaña]”, que xa están “nun punto bastante baixo”.
Corrupción
As denuncias por corrupción que se fixeron públicas nas últimas xornadas en Ucraína, que xa provocaran a detención dun viceministro por recibir subornos para asignar contratos, levaron onte á destitución de cinco gobernadores rexionais, catro viceministros e varios asesores do Goberno de Volodimir Zelenski.
Desde a invasión rusa morreron en Ucraína 7.068 civís, incluídas máis de 400 crianzas, revelou a Oficina das Nacións Unidas para os Dereitos Humanos, a meirande parte delas no Donbás, cuxo control se disputan rusos e ucraínos.