A Audiencia Nacional abriu a última hora da tarde desta cuarta feira unha investigación por presunto ataque terrorista tras o asasinato dun sancristán nun ataque que se saldou tamén con varios feridos en diferentes igrexas de Alxeciras, na provincia de Cádiz (Andalucía).
A investigación recaeu no Xulgado Central de Instrución Número 6, que é o que estaba de garda. Fontes do Ministerio do Interior explicaron que pouco antes das 20 horas unha persoa protagonizou un ataque con arma branca, matando o sancristán da Igrexa da Nosa Señora da Palma —que faleceu no exterior logo de que o atacante accedese previamente ao templo— e deixando ao sacerdote da Igrexa de San Isidro ferido con carácter de gravidade.
O atacante foi detido e atópase baixo custodia da Policía Nacional, informaron as mesmas fontes. O alcalde de Alxeciras, José Ignacio Landaluce, trasladou esta cuarta feira o pesar, tanto a título persoal como en nome e representación da corporación municipal, pola morte de Diego Valencia, o sancristán, que foi vítima dun ataque presuntamente terrorista dirixido a diferentes igrexas.
Así mesmo, o primeiro edil trasladou os seus mellores desexos de pronta recuperación ao párroco da Capela de San Isidro, Antonio Rodríguez, que tamén resultou ferido de gravidade no mesmo ataque e que se atopa ingresado no hospital Punta de Europa.
Segundo informa a canle pública andaluza Canal Sur, o atacante dirixiuse contra as 20 horas a este último templo e, "tras discutir co párroco", asestoulle unha coitelada no pescozo, deixándoo ferido de gravidade malia que non se teme pola súa vida.
Logo trasladouse, segundo a mesma información, á Igrexa da Palma, a maior da cidade e situada nunha rúa céntrica. Alí enfrontouse novamente aos presentes e ao propio sancristán, a quen matou finalmente. Empregou un machete "de grandes dimensións" que posteriormente "paseou pola praza", sinalaron as testemuñas.
Fontes próximas á investigación indicaron nas últimas horas que o sospeitoso é Yasine Kanjaa, un home de nacionalidade marroquí duns 25 anos de idade que vivía nun domicilio próximo a ambos os templos.
