Maribel Sabaté, nai de Anna Gabriel, informaba esta sexta feira no programa El Mon de RAC1 que a súa filla conseguira o permiso de residencia na Suíza por cinco anos. Grazas a este documento, que recibiu a pasada semana, Gabriel terá "a tranquilidade de poder optar a postos de traballo ou apresentarse a convocatorias ás que até agora lle era máis difícil acceder", sinalaba Sabaté.
Segundo contaba a súa nai, a política independentista "non parou quieta" desde que se exiliou en Suíza no pasado mes de febreiro, senón que dedicou o seu tempo a "colaboracións con entidades e cursos de inglés". A isto engadiráselle axiña "un doutorado na Universidade de Xenebra".
Rememorando o día que Anna Gabriel tivo que marchar do Estado español, Maribel Sabaté contaba que a súa filla lle dixera que non quería "pasar nin un día da miña vida nunha prisión cunhas reliquias franquistas que te queren humillar, que te queren facer dicir o que non sentes, non quero pasar por ese trance". Por último, a nai de Anna Gabriel transmitía o agradecemento da ex deputada das CUP á súa vila Sallent, por todo o apoio que recibiu nunha loita na que afirma que continuará.
