Despois de dezanove anos da realización do último debate político electoral, os tres encontros a dúas bandas que terán lugar o día 8, 9 e 10 veñen marcados polas difíciles negociacións previas máis a rigorosa división dos tempos, que, en principio, semella dar para moi pouco debate.
Retransmitido en directo pola TVG e a RG, os debates Feijóo-Vázquez, Vázquez-Jorquera e Feijóo-Jorquera, en días consecutivos, estarán estructurados en tres bloques temáticos -economía e emprego, servizos públicos e autogoberno- de 20 minutos cada un deles. Os candidatos poderán ter intervencións de dous minutos como máximo e consecutivas, co cal queda proibido os cortes ou as interpelacións no medio dos discursos.
Con estas normas ríxidas, para os candidatos que até agora ocuparon a oposición parlamentar ao goberno, os debates se lle presentan como unha posibilidade de expoñer os seus programas e as súas propostas, nun momento no que as críticas de “partidismo” arrecian sobre a TVG. Supón para eles, polo tanto, unha maneira de acadar espazo no ente público galego nun “pé de igualdade” imposíbel en telexornais e outros programas informativos.
Tratarase de encontros, polo tanto, moi controlados no que os opoñentes se atoparán fronte a fronte coa moderadora Marga Pazos de pé entre eles nun plató circular. A CRTVG emitiu neste sentido unha nota de prensa na que quixo deixar constancia das normas coas que se preparan os “trascendentais” cara a cara xa que mesmo sinalou que se “acordou que a temperatura do plató estea arredor dos 21º”.
O calendario finalmente aprobado é o día 8 de outubro,para os candidatos do PPdeG, Alberto Núñez Feijóo, e do PSdeG-PSOE, Pachi Vázquez; o martes, intervirán o aspirante do PSdeG-PSOE, Pachi Vázquez, e do BNG, Francisco Jorquera, e o mércores terá lugar o cara a cara de maior contraste entre os candidatos do PPdeG e BNG.
A CRTVG pautou mesmo a chegada de candidatos á sede de San Marcos, por orde decrecente en función dos votos obtidos no 2009. Cada grupo político poderá levar dez convidados e ábrese tamén a outros medios de comunicación. Os candidatos poderán facer unicamente fotos sen declaracións antes de entrar no debate.
A CRTVG explica que “en cada cara a cara, os candidatos disporán tamén de dous minutos de intervención inicial e dun minuto final de despedida, sen posibilidade de interpelación en ningún dos casos”.
Sarkozy e Hollande
Con case vinte anos sen debates, é unha incógnita como a audiencia galega responderá a súa emisión. Como referencia están os recentes debates da política francesa entre Sarkosy e Hollande nos que os analistas chegaron a falar de que se estaban a xogar máis do 10% dos votos. Daquela, Hollande atacou a xestión de goberno de Sarkozy fronte á intervención máis airada, nerviosa e mesmo faltona deste que acusou de “inexperto” aos seus contrincantes. Os inquéritos arredor do debate deron gañador a Hollande, o mesmo que posteriormente se fixo trunfador das eleccións.
