Os prezos subiron na Galiza desde 2020 a un ritmo 8,6% superior que no Estado español

O Índice de Prezos de Consumo (IPC) situouse en maio na Galiza no seu dato máis baixo en taxa interanual (con respecto ao mesmo mes do ano anterior) desde maio de 2021, ao alcanzar 2,9%, segundo os datos publicados esta terza feira polo Instituto Nacional de Estatística (INE). Porén, este taxa ten unha forte influencia do efecto base, pois a comparanza realízase en relación a un encarecemento xeral dos bens e servizos en maio de 2022 que alcanzaba 9,6%. O IPC rexistra en abril a súa maior suba desde maio de 2022 A inflación (cando alcanza índices positivos) trátase dunha suba continuada dos prezos, medida por un parámetro como o IPC. Este índice, na súa taxa interanual, compárase co seu equivalente do ano anterior. Neste sentido, esta variábel vese moi influenciada polo efecto base. Non é o mesmo comparar cun valor anterior que era anormalmente alto ou baixo que se este foi máis ou menos moderado. Un efecto estatístico que se pode comprobar se no canto de comparar co ano anterior facémolo sobre dous anos ou máis. Desta forma, ao realizar o cálculo da suba de prezos durante os últimos dous anos, desde maio de 2021, obtense unha taxa de incremento de prezos na Galiza que alcanza 12,8%. Con respecto ao encarecemento xeral nos últimos tres anos, o IPC alcanza un índice de 16,5%. A influencia do efecto base pódese corroborar tamén na comparanza cos datos da inflación no Estado español. Se ben é certo que o IPC interanual de maio aumentou na Galiza (2,9%) tres décimas porcentuais menos do que o fixo a nivel estatal (3,2%), atendendo ao dato con respecto ao mes de maio de 2021 obsérvase un incremento seis décimas porcentuais superior na Galiza (12,8%) que no conxunto do Estado (12,2%). De feito, a Galiza é a terceira autonomía do Estado español onde máis se dispararon os prezos durante o últimos tres anos, desde maio de 2020, alcanzando un encarecemento xeral de 16,5%, até 1,3 puntos porcentuais por riba da suba de prezos a nivel estatal, de 15,2%. Así, o índice de prezos aumentou na Galiza durante os últimos tres anos a un ritmo 8,6% superior do que o fixo no conxunto do Estado español. Os prezos acumulan no país un encarecemento de 1,4% no que vai de ano 2023 Por outra parte, a inflación na Galiza rexistrou un descenso mensual, con respecto ao mes de abril, de 0,1%, mentres que a nivel estatal se mantivo estábel nunha taxa de 0%. Porén, os prezos na Galiza acumulan un incremento de 1,4% no que vai de ano e de 1,7% a nivel estatal. Unha vez máis obsérvase a influencia do efecto base, xa que aínda que o IPC aumentou máis a nivel estatal no que vai de ano e na súa taxa interanual, no longo prazo, con respecto a hai dous ou tres anos, obsérvase un maior encarecemento na Galiza. A alimentación continúa sendo o que máis encarece 11,5% é o índice de encarecemento dos produtos alimenticios experimentado na Galiza en maio con respecto ao mesmo mes do ano anterior Os produtos de alimentación seguen a ser o segmento que experimenta un maior incremento do prezos na taxa interanual, ao ser en maio 11,5% máis caros do que eran 12 meses antes. Séguenlle as bebidas alcólicas e o tabaco, cun incremento de prezos de 7,8%; restaurantes e hoteis, que soben 6,9%; outros bens e servizos, cun aumento de 5,9%; móbeis, artigos do fogar e artigos para o mantemento corrente do fogar, cun encarecemento de 5,6%; o lecer e a cultura, cunha alza de 4%; as comunicacións, que encareceron 2,6%, e fechan as subas os produtos e servizos sanitarios, cun aumento de 1,1%. O abaratamento dos alimentos a nivel global non se reflicte na Galiza Pola súa parte, a vivenda e os gastos correntes domiciliares como o auga, a electricidade, o gas e outros combustíbeis, son o apartado que lidera o abaratamento de prezos durante os últimos 12 meses, cunha baixada de 12,2%. Séguenlle, de lonxe, os gastos relativos ao transporte (-2,9%), á ensinanza (-0,8%) e a roupa e o calzado (-0,1%). O azucre, cun encarecemento de 46,3%, e a manteiga, cunha suba de prezos de 25,2%, son os produtos cunha maior taxa de inflación nos últimos 12 meses O INE non achega datos relativos á Galiza sobre os produtos específicos de alimentación. A nivel do Estado español, en taxa interanual, os alimentos que máis subiron de prezo son o azucre (46,3%), a manteiga (25,2%), o aceite de oliva (24,7%), o leite enteiro (24,3%), as patacas (23,6%), a carne de porcino (16,1%), os legumes e as hortalizas frescas e outros preparados alimenticios (15,8% en ambos os casos), e os cereais e os seus derivados (15,5%). 12,8% é a porcentaxe de aumento da inflación na Galiza durante os últimos dous anos, é dicir, desde maio de 2021. Unha taxa que supera en seis décimas porcentuais a estatal, de 12,2% Ademais, outros moitos produtos alimentarios rexistran subas interanuais de dous díxitos nos seus prezos, como os refrescos e zumes (14,6%), os produtos lácteos (14,5%), os ovos (13,2%), os preparados de legumes e hortalizas (12,8%), outras carnes (11,9%), o auga mineral (11,7%), os aceites e graxas (11,6%), e as bebidas alcólicas ( 10,4%). 34,9% é a porcentaxe de abaratamento da electricidade durante os últimos 12 meses, cunha caída de 34,9% no seu prezo, tendo unha grande influencia na desaceleración da inflación Pola contra, os produtos e servizos nos que máis caeron os prezos en maio en relación ao mesmo mes do ano anterior foron a electricidade (-34,9%), outros aceites (-32,6%), os combustíbeis líquidos (-27,1%) e o transporte en autobús (-24,9%). 90% da inflación provén dos beneficios empresariais Os beneficios empresariais explican a maior parte da inflación xerada internamente no Estado español, segundo os datos achegados pola Organización para a Cooperación e o Desenvolvemento Económicos (OCDE). A CIG demanda unha suba salarial de 5% para empregados públicos en 2023 e 2024 para paliar a inflación Máis de 90% destas presións internas sobre os incrementos de prezos proceden do aumento dos beneficios empresariais. Pola contra, os salarios xogaron un papel moi moderado. O español é o Estado onde os beneficios empresariais teñen unha maior influencia sobre a crise inflacionista De feito, os datos da OCDE amosan que os salarios non son o principal responsábel da persistencia do actual episodio inflacionista en economías tan importantes como as de Francia, Italia ou o Reino Unido, así como no conxunto da zona euro. Porén, o peso dos beneficios empresariais na persistencia da inflación no Estado español é o caso máis extremo de todos. O incremento dos beneficios empresariais en sectores como a minería, a electricidade, o gas e a subministración de auga destacaron sobre outros tipos de negocios, segundo a OCDE. "Estes sectores representan 4% da economía media mais xeran máis de 40% do aumento dos beneficios do ano 2022", sostén o informe da organización das principais economías globais. A este grupo fóronse incorporando nos últimos trimestres de 2022 as manufacturas e os servizos. A OCDE explica os datos estatais pola estrutura oligopolística dalgúns sectores económicos españois e o seu poder de fixación de prezos, así como polo adianto das empresas ante a advertencia de suba de custos pola guerra. A Galiza é a terceira comunidade coa maior suba de prezos en 3 anos A Galiza é a terceira autonomía do Estado español onde máis subiron os prezos desde maio de 2020, cun encarecemento de 16,5%, mentres que no conxunto do Estado a taxa do IPC nos últimos tres anos foi de 15,2%. O índice galego tan só foi superado por Castela-A Mancha (18%) e Castela e León (17,1%). Pola contra, o menor encarecemento deuse na Comunidade de Madrid (13,2%).