A inflación encarece máis de 50% varios produtos de primeira necesidade

O conflito con Ucraína, sumado aos paros no transporte, ameazan con agudizar aínda máis o encarecemento de produtos básicos. 
A crise e o paro dos transportistas provocaron desabastecemento nos supermercados, que xa van recuperando a normalidade (Foto: Carlos Castro / Europa Press).
photo_camera A crise e o paro dos transportistas provocaron desabastecemento nos supermercados, que xa van recuperando a normalidade (Foto: Carlos Castro / Europa Press).

A pasada cuarta feira deuse a coñecer o dato do Índice de Prezos ao Consumo (IPC) de marzo que sitúa a inflación no Estado en 9,8%. Con todo, a cifra só computa até o pasado día 21 e non contempla o impacto nos prezos da falta de produto polo paro no transporte. Á espera de coñecer o dato definitivo e o galego ─publícanse o día 13─, as persoas consumidoras xa notan as subas nos seus petos.

─ Os carburantes son un dos produtos que máis se encareceron no último ano. Encher un depósito medio de gasolina de 55 litros é 37,88% máis caro que na mesma semana de 2021 e 55,93% superior no caso do gasóleo, combustíbel este último que xa supera en prezo á gasolina (1,837  euros de media fronte 1,818 euros do diésel, segundo o último Boletín Petroleiro da Unión Europea) pola súa dependencia das exportacións rusas.

─ A enerxía tamén cotiza en prezos récord, até o punto de que marzo xa é oficialmente o mes máis caro da historia. Hoxe a luz págase de media a 224,75 euros megawatt hora, 6,1% menos que onte, pero 331,21% máis cara que os 52,12 euros/MWh do 1 de abril de 2021. 

─ O pan é outro dos produtos que máis nota o impacto da guerra en Ucraína, país do que se importa boa parte do trigo que despois se emprega para producir as fariñas coas que se elabora o pan. Se hai un ano pagábase 1 euro por unha barra, hoxe o seu prezo ronda o 1,20 euros. 

─ A carne de vacún estase a vender en moitos dos casos por baixo dos prezos de produción. Aínda así, pagábase en febreiro 3,8% máis cara que hai un ano. Porén, a que máis encareceu na Galiza foi a de ovino (+12,5%), seguida da de ave (+7,3%) mentres que a de porco até rebaixou 0,8% o seu valor. 

─ Os ovos, igual que subiu a carne de ave polos maiores custos da alimentación animal, tamén viron incrementado o seu prezo en 8,1% no último ano.

─ Os aceites están a ser un dos grandes protagonistas desta escalada de prezos. Segundo o Instituto Galego de Estatística (IGE), en febreiro xa subiran 27,8% no país con respecto ao mesmo mes do ano anterior, máis aínda non se notaran as consecuencias da guerra en Ucraína, principal país exportador de aceite de xirasol.

─ O leite foi un dos produtos que chegou a escasear nos lineais dos supermercados durante os paros do transporte. Producilo, segundo os datos dun informe da Xunta da Galiza, ronda os 40 céntimos, mais nas granxas non chegan a cobrar máis de 0,35 euros por litro. No supermercado, algunhas firmas de distribución repercutiron o aumento dos custos no prezo final que, con todo, só varía nun par de céntimos respecto do que se pagaba hai un ano. 

─ O café, pola contra, si que experimentou cambios. De media, os locais de hostalaría aumentaron uns 20 céntimos o que cobraban por esta bebida para compensar as subas no seu recibo da luz, mais tamén do propio gran e, curiosamente, tamén das embalaxes de cartón nas que se transportan.

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios