A sede fiscal da central de biomasa de Greenalia pasa a estar emprazada en Luxemburgo. Segundo transcendeu esta cuarta feira, o novo socio único da factoría de Teixeiro é Greenalia Biomass Power Luxemburgo SARL, domiciliada nos números 8 e 10 da Avenue da Gare de Luxemburgo. A compañía tivo até o mes de decembro a súa sede na Coruña.
A factoría de biomasa está situada no parque empresarial de Teixeiro, no concello de Curtis. Segundo sinala a compañía, a planta dispón dunha potencia instalada próxima a 50 megawatts, unha capacidade de xeración de 325.000 megawatts por hora ao ano e produce electricidade para abastecer o consumo dunha poboación de 300.000 habitantes. A autorización da planta de biomasa de Greenalia en Teixeiro obrigou o Partido Popular a promover un cambio legal.
Así, o grupo parlamentario do Partido Popular promoveu unha mudanza normativa mediante a Lei de medidas fiscais e administrativas de 2016, modificando o disposto o Decreto 149/2008, e permitindo centrais de biomasa sen límite de potencia.
Portas xiratorias
Beatriz Mato, actualmente directiva do grupo Greenalia, exercía naquela altura de conselleira de Medio Ambiente, departamento da Xunta da Galiza que emitiu informes para evitar que o proxecto da planta de biomasa non tivera que "someterse ao proxecto de avaliación do impacto ambiental común".
Greenalia contou con financiamento da Unión Europea para poder acometer o investimento da planta de biomasa de Teixeiro. Concretamente, o Banco Europeo de Investimentos concedeulle en xullo de 2018 un crédito en condicións vantaxosas de 50 millóns de euros, dentro do marco do denominado Plan de investimentos para Europa, popularmente coñcido como o Plan Juncker.
