A Galiza foi o segundo territorio con máis megawatts de eólica tramitados polo Goberno español, segundo informou onte o Ministerio para a Transición Ecolóxica e o Reto Demográfico (Miteco), entre os proxectos cuxa data para obter a Declaración de Impacto Ambiental (DIA) caducaba o pasado 25 de xaneiro.
En concreto, o Goberno español avaliou máis dun milleiro de megawatts na Galiza, dos que se aprobaron 656 -unha cuarta parte dos 2.897 megawatts con luz verde no Estado-, correspondentes a sete parques eólicos, cinco deles para Alcoa e outros dous para Showa Denko.
Un proxecto de 78 megawatts foi rexeitado, mentres que catro proxectos que sumaban 279 megawatts foron arquivados. Só a comunidade de Castela e León tivo máis megawatts avaliados neste trámite, con 1.604.
Parque para Alcoa, arquivados e denegados
Os parques eólicos aprobados para fornecer enerxía a longo prazo á planta de San Cibrao, no municipio de Cervo, son os de Barqueiro, Badulaque, Santuario, Tesouro e Moeche. Mentres, os parques chamados Orzar e Tornado serán para Showa Denko.
O proxecto denegado foi o de Caaveiro. Proxectábase entre Fene, Neda, Cabanas, San Sadurniño, A Capela e As Pontes. Ademais, catro foron arquivados. Dous deles promovidos por Green Capital: Fonte Barreiros -en Ribadeo, Barreiros, Foz, Cervo e Xove-; así como Rula, de 55 megawatts -en Cerdedo-Cotobade e Ponte Caldelas-.
O terceiro arquivado foi de Greenalia, que agrupaba os de Tramontana e Siroco. Finalmente, o cuarto arquivado, tamén de Greenalia, chamado Furacán, proxectábase entre Brión, Noia, Lousame e Rois.