O CES demanda á Xunta da Galiza unha proposta "lóxica" sobre enerxía renovábel

A aprobación en marzo deste ano do informe O sector enerxético galego: presente e futuro propiciou onte unha xornada de debate e análise sobre o tema no Consello Económico e Social da Galiza (CES). Nela participaron, entre outras persoas, un dos autores do traballo, o profesor da Universidade da Coruña (UDC) , Guillermo Iglesias, e representantes de organizacións do país. Entre as preocupacións que sinala o estudo elaborado a través dun convenio de colaboración entre o CES e a UDC está a dependencia enerxética da Galiza, que importa até "75%" dos recursos, e a necesidade de coordinación entre as diferentes administracións con competencias nesta materia. Guillermo Iglesias, en declaracións a Nós Diario, considera que “as enerxías renovábeis e a eficiencia enerxética son as chaves do futuro na Galiza a nivel enerxético”. Por este motivo cre que a “planificación axeitada é relevante” algo que, a nivel galego, “debería contar con máis coordinación”. Neste sentido, pediu que a Xunta da Galiza faga “unha proposta lóxica” que reverta os beneficios, ademais de no tecido empresarial, “nos cidadáns” e tamén cun “maior papel das universidades”. O resultado agora mesmo, para este investigador, é a "falta de participación cidadá que mesmo descoñece moitos dos programas de eficiencia que hai activos". A patronal eólica advirte que a electrificación da economía "non vai ao ritmo" dos obxectivos 'verdes' As outras renovábeis No estudo tamén queda claro que na Galiza teñen futuro máis enerxías renovábeis que a eólica. "Hai proxectos de biomasa que temos que aproveitar", sinala Iglesias que salienta a súa importancia como recurso que, ademais, “pode permitir a posta en valor do monte galego, con todo o que leva aparellado de fixación de poboación no medio rural, creación de tecido industrial e prevención de incendios”. No debate aberto no CES, Iglesias apuntou a necesidade d eter en conta "dentro da economía circular a utilización de resíduos de todo tipo, como os biogases". Neste sentido lembra a Nós Diario que a Galiza "é punteira en gandaría e en agricultura polo que temos que explotar esas opcións que tamén están catalogadas como renovábeis". Renovábeis sen industria A mesa central da xornada do CES tratou sobre o Impacto das novas fontes de enerxía en base ás achegas deste estudo. En representación da CIG, Fernando Branco Parga sinalou a Nós Diario que o debate máis importante ten que ser a finalidade da enerxía que crea na Galiza. “Todo o que se fixo na Galiza neste sector ao país no seu conxunto non lle valeu practicamente para nada”, asegura e pon como exemplo o caso de Euskal Herria que “conta con máis industria con 160 MW eólicos instalados que a Galiza con 3.800 MW”, engade. A UE pacta subir a 42,5% a produción de enerxía "verde" tras ceder ante a nuclear francesa Este sindicalista rexeita que o país “leve todos os aspectos negativos, como as cuestións medioambientais, e ningún custe positivo”. Denuncia que o “lobby enerxético ten a capacidade de introducir mensaxes que lles benefician” cando con esa potencia actual “a Galiza está baixando o consumo”. Este sindicalista bota en falta que non se pon o acento nun dos apartados do propio estudo: o racionamento enerxético. “Levamos demandado un centro de investigación para poder xestionar os recursos que producimos, unha figura que xa existe en Estremadura e que aquí a Xunta rexeita”, confirma Branco Parga. Proxectos dependentes Para Francisco Méndez Gomez (CCOO) “non é posíbel ter industria sen ter un desenvolvemento enerxético e unhas fontes de enerxía a un prezo razoábel”. Indica a Nós Diario que a Galiza “perdeu as revolucións industriais e nesta, a da transición enerxética para ir cara enerxías máis limpas, como non teñamos as necesarias perderémola tamén: volvemos á fame, á miseria e á emigración”. Considera que o país “leva quince anos de atraso, desde o primeiro plan do bipartito” con proxectos industriais “pendentes de que se monten os proxectos eólicos pendentes, como é o caso de Alcoa. que non podería reabrir en 2026, o de Sentury Tire nas Pontes ou o de ENCE”. Desde a UXT, Marcos Prieto Seijas, lembra que a Unión Europea (UE) "obriga ás empresas a cambiar cara un sistema renovábel e por este motivo achega fondos que enfíen ese camiño". Con esta situación, que cualifica de "delicada", moitas empresas "languidecen" polo "sobrecusto eléctrico elevado" e o resultado é "unha importante incerteza a nivel laboral nun territorio que precisa de postos de traballo estábeis e de calidade". Galicia: paraíso das renovábeis, inferno para os galegos Este panorama podería mudar, para este sindicalista, "coa chegada das renovábeis". Para este sindicato, a posibilidade de contar con este tipo de enerxía "é unha oportunidade"para que esas empresas poidan sobrevivir e abre un mercado para a chegada de novas compañías". Algúns exemplos, para Prieto Seijas, serían "a planta de hidróxeno en Meirama ou as iniciativas que hai nas Pontes". Porén, a incerteza, entende a UXT, "está nos prazos que se están a dar agora mesmo" que deberían ser menores "para salvar postos de traballo". Os diferentes "tempos" Aprimeira mesa da xornada do CES reuniu a un do autores do estudo, Guillermo Iglesias; ao xefe de departamento do Instituto Enerxético da Galiza (Inega), Emérito Freire; e ao membro da Confederación de Empresarios da Galiza (CEG). Unha das cuestións sobre a que o profesor da UDC chamou a atención é a importancia dos "tempos" á hora de planificar e tomar decisións en materia de desenvolvemento enerxético. Puxo como exemplo a xestión da eólica mariña en Alemaña, un país que decidiu, daquela, "tomarse unha pausa" tras un primeiro momento no que "se ía moi rápido". Isto é, para Guillermo Iglesias, porque os tempos da ciencia son "moi" distintos aos do regulador, que ven influídos por acontecementos ou desafíos, como ocorreu recentemente coa guerra de Ucraína, o que dificulta o impulso de determinados sistemas ou métodos de produción. A UE eleva a 42,5% o obxectivo de consumo de renovábeis para 2030 Sobre isto tamén puxo o foco o responsable do Inega, que incidiu na importancia de "compasar" os escenarios enerxéticos aos avances tecnolóxicos. Pola súa parte, o representante do tecido empresarial galego apuntou á necesidade de que existan marcos lexislativos e administrativos "estábeis" para, así, outorgar "certezas" a investidores, empresas e cidadanía.