O BCE eleva os tipos de xuro até o limiar de 4% e aposta por seguir coa alza en xullo

O Consello de Goberno do Banco Central Europeo (BCE) decidiu esta cuarta feira elevar os tipos de xuro 0,25%, tal e como daba por descontado o consenso do mercado, de forma que a taxa de referencia para as operacións de refinanciamento situarase en 4%, mentres que a taxa de depósito alcanzará 3,5% e a da facilidade de préstamo 4,25%. O Euribor marca un novo máximo desde decembro de 2008 e alcanza a taxa de 3,862% Con esta oitava suba consecutiva do prezo do diñeiro, que se situou no seu nivel máis alto en case 15 anos, o BCE segue adiante co endurecemento da súa política monetaria, despois de que a Reserva Federal dos Estados Unidos de América (EUA)decidira na xornada previa facer unha pausa no ciclo de alzas, tras dez incrementos consecutivos desde marzo de 2022. Coa suba dun cuarto de punto anunciada polo BCE, en liña coa adoptada en maio, a institución con sede en Frankfurt alcanzou un incremento do prezo do diñeiro de 4% durante o actual ciclo de subas, que deu comezo en xullo do ano pasado. A decisión do BCE, que afonda na senda de incremento do custo das hipotecas e do financiamento en xeral, chega despois de que a taxa de inflación interanual da zona euro se desacelerase en maio até 6,1%, nove décimas por baixo da suba de prezos de abril e o seu nivel máis baixo desde febreiro de 2022, mentres que ao excluír do cálculo o impacto da enerxía e dos alimentos, o alcol e o tabaco, a taxa subxacente moderouse a 5,3% desde a taxa de 5,6% do mes anterior. Así mesmo, hai unha semana Eurostat (a axencia estatística da Unión Europea) revisaba á baixa os seus datos de crecemento do Produto Interior Bruto (PIB) da zona euro, que finalmente rexistrou unha contracción de 0,1% no primeiro trimestre de 2023, o que supón a entrada en recesión técnica da economía da rexión, despois da caída da actividade de 0,1% no trimestre anterior. Trátase da primeira recesión rexistrada na economía da zona euro desde as contraccións consecutivas do PIB no primeiro e no segundo trimestre de 2020, como consecuencia do impacto da pandemia da Covid-19 e das restricións implementadas. O aumento dos tipos de xuro continuará en xullo A presidenta do BCE, Christine Lagarde, asegurou que é “probábel” que volvan subir os tipos de xuro na reunión de xullo. Segundo a representante da institución, o endurecemento da política monetaria continuará até que non cambie de “maneira substancial o escenario base que manexamos para a inflación”. O endurecemento do tipos de xuro infla os prezos das novas hipotecas Lagarde apuntou que desde o BCE serán “tan restritivos como sexa necesario para alcanzar o noso obxectivo”, descartando así unha pausa nas subas de tipos de xuro como a que decidiu acometer a Reserva Federal dos EUA. “Atopámonos a metade do camiño para conseguilo”, apuntou ao ser preguntada sobre se o BCE se propón rebaixar o seu obxectivo de inflación até unha taxa de 3% (no canto do actual obxectivo marcado en 2%). "A inflación estivo baixando, mais prevese que se manteña demasiado alta durante demasiado tempo. O Consello de Goberno (do BCE) está decidido a que a inflación volva ao seu obxectivo de medio prazo de 2% no momento oportuno", afirmou. "Os custos dos préstamos aumentaron considerabelmente e o crecemento dos préstamos estase desacelerando. As condicións de financiamento máis estritas son unha razón chave pola que se prevé que a inflación diminúa", explicou Lagarde. Previsións económicas Ademais de anunciar o encarecemento do diñeiro, o BCE tamén expuxo as súas previsións económicas. Desta forma, revisou á alza as súas expectativas de inflación no presente exercicio e nos próximos dous anos, mentres que empeorou lixeiramente os seus prognósticos de crecemento para a economía da zona euro para 2023 e 2024. O BCE advirte da fraxilidade do crecemento económico nunha situación de incerteza Os expertos do banco central esperan que a inflación xeral se sitúe nunha taxa media de 5,4% en 2023 e de 3% en 2024, mentres que un ano despois estiman que será de 2,2%, aínda por encima da meta de estabilidade de prezos a medio prazo do BCE. Así, os técnicos da institución revisaron unha décima á alza as súas proxeccións de marzo para cada un dos anos do horizonte temporal das súas proxeccións. Por outra parte, o BCE advertiu de que os indicadores das presións inflacionistas subxacentes "seguen en niveis elevados", aínda que algúns mostran sinais incipientes de enfraquecemento. Neste sentido, os expertos revisaron á alza as súas proxeccións de inflación subxacente, que exclúen o impacto da enerxía e os alimentos, especialmente para este ano e o próximo, dados os inesperados aumentos anteriores e as implicacións da solidez do mercado de traballo para o ritmo de desinflación. En canto ao crecemento do PIB, as previsións rebaixáronse lixeiramente para este ano e o seguinte. Deste modo, os expertos prevén que a economía da zona euro creza 0,9% en 2023, 1,5% en 2024 e 1,6% en 2025. Con esta actualización de xuño, as perspectivas da institución monetaria empeoraron unha décima as súas previsións de marzo para este ano e o seguinte, mentres que confirmaron o crecemento previsto para 2025. Luz verde ás compensación por abusos hipotecarios O Tribunal de Xustiza da Unión Europea (TXUE) afirmou esta cuarta feira nunha nova sentenza que o dereito da Unión Europea (UE) non se opón a que, no caso de que se anulara un préstamo hipotecario con cláusulas abusivas, as persoas usuarias reclamen ao banco unha compensación que exceda o reembolso das cotas mensuais abonadas. Para dirimir un caso, o órgano xurisdicional polaco preguntou ao TXUE se a directiva sobre as cláusulas abusivas, así como os principios de efectividade, seguridade xurídica e proporcionalidade, permiten ás partes dun contrato de préstamo hipotecario, anulado debido a que non pode subsistir tras a supresión dunhas cláusulas abusivas, solicitar unha compensación que exceda da devolución das cantidades respectivamente abonadas sobre a base dese contrato, así como do pago de xuros de demora ao tipo legal desde que se requira o seu pagamento. En mans dos Estados O TXUE sinala que a directiva "non regula expresamente" as consecuencias que implican a invalidez dun contrato asinado entre unha persoa usuaria un profesional e tras a supresión das cláusulas abusivas que contén, polo que deixa en mans dos Estados determinar cales son estas implicacións.