O baixo prezo das importacións de gran ucraíno fai perigar o abastecemento

Bulgaria, esta cuarta feira, foi o cuarto Estado da Unión Europea (UE) que aprobou unha prohibición temporal da importación de produtos agrícolas ucraínos. A decisión búlgara foi tomada despois de que os cereais procedentes de Ucraína libres de aranceis asolagaran o mercado, facendo afundir os prezos e provocando a protesta dos agricultores locais. Polonia foi a primeira en anunciar a semana pasada a prohibición temporal á importación de cereais e outros produtos alimenticios provenientes de Ucraína. Posteriormente, Hungría e Eslovaquia e Bulgaria, seguiron os seus pasos. Ademais, o Partido Socialdemócrata de Romanía, que lidera o Goberno, anunciou que solicitará ao Executivo que aprobe un decreto de emerxencia para paralizar a importación de cereais ucraínos. Explotacións de Castela e León alertaron de caídas de prezo do gran de 30% Tras o inicio da invasión rusa de Ucraína, a UE decidiu cancelar os aranceis aos cereais ucraínos nun intento de apoiar a economía deste Estado. Agora, a caída de prezos provocada polo exceso de produto chegou até as fronteiras da Galiza. Desta forma, explotacións de Castela e León alertaron de que a entrada de gran de Ucraína está a provocar unha cotización á baixa do trigo de até 30%, coa "permisividade de Bruxelas", debido a que se está producindo sen os límites e aranceis obrigatorios para as importacións que chegan á UE procedentes de terceiros Estados, un problema que se une ao da grave seca nestes meses. A Galiza produce a cuarta parte dos cereais en gran que xeraba hai 40 anos No caso da Galiza, o problema non está a ter gravidade polo momento, pois o galego é precisamente un mercado dependente das importacións de cereal procedente de Ucraína. De feito, o Estado español é o primeiro receptor de cereais (trigo, cebada e millo) desde Kiív, ao ser deficitario nestas producións, situación que se agrava aínda máis no caso da Galiza. As medidas que están a tomar varios Estados da UE poderían exacerbar a escaseza mundial de alimentos, particularmente se non se prolonga o acordo sobre o transporte de cereais desde os portos do mar Negro, que expirará o próximo 18 de maio e sobre o que existe incerteza das súas perspectivas de renovación. Neste sentido existe preocupación de que o impacto combinado da suspensión por parte dalgúns Estados da UE da importación de gran ucraíno e o posíbel fracaso para acordar unha extensión do acordo sobre o transporte de grans deixaría millóns de toneladas de grans varadas en Ucraína, podendo causar escaseza de alimentos. A Galiza importou millo de ucraína por 41 millóns de euros en 2021 Tan só durante o ano 2021, a Galiza importou aceite de xirasol por valor de 92 millóns de euros e millo por 41 millóns de euros de Ucraína, sendo esta última unha das principais materias primas coas que se elaboran os pensos que alimentan o gando das explotación galegas. Durante o comezo da guerra no territorio ucraíno e até que foi selado o acordo para facilitar as exportacións deste Estado, as reservas galegas entraron nunha situación de risco, ao descender as reservas de millo nos portos galegos até un almacenamento suficiente para mes e medio. Polo tanto, unha crise de subministracións de gran a nivel global deixaría nunha difícil situación a economía galega, unha cuestión que deixa entrever o gran problema de soberanía alimentaria que ten a Galiza. Porén, tamén se podería considerar que o campo galego se atoparía ante a oportunidade de volver ser unha potencia de millo para a elaboración de pensos. Un país dependente O economista, analista e escritor Marcelino Fernández Mallo, en conversa con Nós Diario, sinala que na Galiza "hai unha demanda máis ou menos estabilizada" mentres que a nivel global "hai unha oferta que está totalmente descarreirada polas circunstancias extraordinarias que supoñen a invasión rusa de Ucraína e a intervención de diferentes Estados, como os da UE". Marcelino Fernández Mallo, economista e escritor: "Sábese desde hai anos do risco de desabastecemento" Ao respecto da crise provocada polo baixo prezo do gran ucraíno, Fernández Mallo opina que "é unha situación normal dentro da actual irracionalidade". "Trátase dun episodio máis dentro dun período irregular, que neste caso está pulsando os prezos á baixa así como anteriormente houbo circunstancias que os alzaron". O economista lembra que "existen contratos a medio e longo prazo nos mercados financeiros e cada movemento altera moito o resultado final desas transaccións". "Estamos ante un mercado totalmente errático que está ademais condicionado por factores externos, polo que esta desorde fai que calquera cousa sexa posíbel", engade. No caso específico da Galiza, di, "isto vén confirmar que estamos completamente sometidos a forzas que nada teñen que ver con nós, e que somos nada máis que receptores dunha situación, non somos actores, sufrimos un escenario que non controlamos". Fernández Mallo: "Substituír eucalipto por produción agraria non é fundamentalismo, é pura eficiencia económica" "A alternativa é obvia, mais no canto de termos reforzado a produción nos últimos anos, o que fixemos foi perder cada vez máis capacidade de xerar gran galego, até a situación actual, que é irrisoria pola escasa capacidade produtiva que ten o país, cando somos un dos maiores demandantes per cápita de cereais e de produtos derivados do cereal", conclúe Fernández Mallo. 100 millóns para os Estados afectados polo cereal de Kíiv A presidenta da Comisión Europea, Ursula von der Leyen, anunciou esta cuarta feira unha nova axuda de 100 millóns de euros para os Estados lindeiros con Ucraína, que son os máis afectados polo incremento de importacións de gran e cereal ucraíno, unha partida que se suma aos 56,3 millóns financiados pola reserva agrícola para os agricultores búlgaros, polacos e romaneses. Así o manifestou nunha carta aos líderes de Polonia, Hungría, Bulgaria, Romanía e Eslovaquia, descontentos polo volume de perdas nas súas economías ante o exceso de importacións de gran chegadas de Ucraína. Legalidade do veto Estes Estados solicitaran ao Executivo comunitario a reintrodución de aranceis para paliar esta situación, ao tempo que Bruxelas estuda a legalidade do veto temporal anunciado por Polonia e Hungría ás importacións de gran e outros produtos do sector agroalimentario procedentes de Ucraína. Neste contexto, o comisario do Executivo da UE responsábel de Comercio, Valdis Dombrovskis, reuniuse esta cuarta feira con representantes de Polonia, Hungría, Bulgaria, Romanía e Eslovaquia, así como con autoridades ucraínas, para abordar a situación actual e as medidas que Bruxelas puxo sobre a mesa para paliar a crise do cereal.