As axudas Impacto Autónomo exclúen as explotacións agrarias con menos recursos

O Programa Impacto Autónomo 2023 que activou este ano a Consellaría de Promoción de Emprego e Igualdade da Xunta da Galiza semella que non chegou a todos os sectores. A iniciativa, que se anunciou como unha proposta da Administración de apoiar ás persoas traballadoras autónomas e microempresas fronte á situación económica xerada pola suba dos custos en materias primas e subministracións, deixou fóra unha parte do ramo que se dedica a actividades agrícolas e gandeiras na Galiza. O Sindicato Labrego Galego alerta de contratos abusivos no sector leiteiro É a situación que vén de denunciar o Sindicato Labrego Galego (SLG) que constatou “discriminación” das granxas ante as dificultades para incorporar a súa tributación coas condicións que marcou a convocatoria. Desde a Xunta, fontes da Consellaría consultadas por Nós Diario sinalan que as condicións e requisitos de acceso ao programa, así como o procedemento a seguir, "foron consensuados coas entidades máis representativas do traballo autónomo na Galiza: APE Galiza, ATA e UPTA-Agtamar". Cifras incompatíbeis Tras o anuncio do programa, o SLG percibiu que algunhas cantidades que se solicitaban para acceder ás axudas poderían non ser compatíbeis coas que percibe unha parte do sector produtivo agrario. Xa no mes de xaneiro, con anterioridade á apertura do procedemento, solicitou adecuar o tope de ingresos de acceso á realidade gandeira e labrega da Galiza revisando, sobre todo, a condición de ter máis de 10.000 euros de beneficio neto en 2021. Denuncian falta de control e contratos abusivos da industria ás granxas de carne A organización defendía que as explotacións de bovino de carne que tributan ao Estado español por módulos no Imposto sobre a Renda das Persoas Físicas (IRPF) con ingresos brutos inferiores a 110.000 euros, é dicir, a práctica totalidade do sector na Galiza, non poderían entrar neste programa. O coordinador da área de traballo de fiscalidade do SLG, Antonio Villarino, explica a Nós Diario que as autónomas e os autónomas “son un colectivo moi amplo e, no caso do réxime especial agrario, teñen unha serie de especificidades que non se contemplaba na orde”. En concreto, este técnico sindical indica que as explotacións de carne de vacún galegas, 19.500 en todo o país e a maior parte familiares, “non teñen un rendemento moi elevado na súa declaración da renda e non chegan aos 10.000 euros mínimos que impón como condición a Consellaría”. Isabel Vilalba: "Hai que acabar co abuso das grandes industrias" Fenda dixital Ademais, a primeira das dificultades coas que se atopan as explotacións é o propio acceso á presentación da documentación que se require para contar coas axudas. Villarino considera que o sistema de procedemento, con concesión por concorrencia competitiva online, “crea desigualdade por non ter en conta as dificultades que proceden da falta de formación administrativa especializada ou da pouca calidade de internet que ten o rural galego”. Para este técnico, “o normal cando se distribúe diñeiro público, é que se faga con criterios sociais ou políticos que garantan que chegue ás persoas que máis o necesita e non quen sexa máis rápido”. Neste sentido, o propio inicio do programa contou con varios problemas por colapsarse, nun primeiro momento, ao acceder unhas 80.000 persoas cando se abriu. “Entendo que a presentación por internet procura facilitar a xestión á Administración galega mais é inxusta por privar de dereitos unha parte da poboación, alén de ser unha perversión da lexislación no relacionado co mérito, capacidade e necesidade”, conclúe Villarino. O SLG demanda medidas para o sector vacún da carne Exceso de burocracia As condicións do programa e a presentación online non foron os únicos problemas que foron albo das críticas nesta iniciativa da Xunta. Villarino relata que recibiron numerosas queixas de granxas que si cumprían as condicións e podían acceder a esta prestación mais se lles requiriu nova documentación vía telefónica, “desestimando a que realmente demostra que contan con eses requisitos, por exemplo, o criterio de facturación mínima acreditado cos certificados de retención das empresas que realizan a recollida do leite”. Como aclara Villarino, neste aspecto “hai que ter en conta que o feito de presentar novos documentos significaría que o expediente se consideraría completo na data de presentación da última documentación e pasaría á final da listaxe, correndo o risco de non entrar por falta de fondos da Xunta”. Desde o SLG aseguran que estas anomalías provocan atrasos nas tramitacións e, polo de agora, hai moi poucas aprobacións de persoas físicas "e ningunha de sociedades" que remataran o proceso. O rural está en venda, o futuro da Galiza tamén "Pídenlles o imposto sobre sociedades para xustificar a facturación cando as granxas non o teñen ao tributar no IRPF, fundamentalmente, mais a Administración non entende a documentación que se lle presenta e non a aceptan polo que, a estas alturas, tiñan que estar resoltas todas as solicitudes e non o están en absoluto”, afirma. “Seguramente este é un dos colectivos que máis burocracia ten que asumir agora mesmo", conclúe Villarino.