Un total de 89 vivendas foron obxecto de senllas execucións hipotecarias no segundo trimestre do presente ano. Son 23 máis que as afectadas por este procedemento na Galiza entre xaneiro e marzo, o que se traduce nun incremento de 34,8%. Porén, foron 47,3% menos que no mesmo período de 2022.
Así se desprende dos datos publicados esta sexta feira polo INE, que explica tamén que do total de vivendas afectadas no conxunto do país entre abril e xuño, o groso (78) corresponde a inmóbeis de persoas físicas, e os 11 restantes, de persoas xurídicas. Estatística, con todo, lembra que non todas as execucións de hipoteca rematan co lanzamento —desafiuzamento— dos seus propietarios.
No segundo trimestre, a cifra de todas as leiras que sufriron execucións hipotecarias na Galiza foi de 146. Así, ademais das 89 vivendas, houbo outras 47 leiras urbanas e tres solares afectadas.
Datos estatais
No conxunto do Estado español, o número de execucións hipotecarias sobre vivendas habituais situouse en 2.697 no segundo trimestre, a menor cifra nun segundo trimestre desde 2020 e que supón un descenso de 16% a respecto do mesmo período de 2022. No entanto, en relación ao trimestre anterior, a cifra de execucións hipotecarias sobre vivendas habituais incrementouse, igual que na Galiza, mais neste caso por volta de 6,1%.
O obxectivo principal desta serie estatística é ofrecer trimestralmente o número de certificacións de execucións hipotecarias iniciadas e inscritas nos Rexistros da Propiedade durante o trimestre de referencia. No segundo trimestre do ano iniciáronse 5.386 execucións hipotecarias, 26% menos que en igual período de 2022, pero 4,2% máis que no primeiro trimestre do ano. Delas, 5.100 afectaron leiras urbanas —onde se inclúen as vivendas—, e 286, leiras rústicas.
As execucións hipotecarias sobre leiras urbanas baixaron 25,5% interanual no segundo trimestre e subiron 3,3% en relación ao trimestre anterior. Dentro das leiras urbanas, 3.677 execucións corresponderon a vivendas, 21,6% menos que no segundo trimestre de 2022 e 0,4% menos que no trimestre anterior.
