O Descenso galego en bicicleta de montaña (BTT) ofrece este ano nove eventos, dous deles urbanos, distribuídos no calendario sen grandes pausas. O incremento das probas da Copa Galiza e a entrada do Trofeo Federación DHI Manzaneda Bike Park na Copa de España son as grandes novidades.
O certame, coordinado pola Federación Ciclismo Galego, consta dunha cita máis que no 2022, pasando de catro a cinco, e será o encargado de abrir a tempada. As dúas primeiras xornadas decorrerán na primavera. O 23 de abril, o Club Ciclista Compostelán retomará o Descenso Cidade de Santiago (comarca de Compostela), que alcanzará a súa décima edición, e o 14 de maio será o Bicicletas Chinquena Racing quen estree, en Verín, o DH Cabreiroá.
Tras unha paréntese de catro meses, a competición regresará o 10 de setembro co DH Vilaboa 2023, do Club Deportivo Kamikazes, e a fin de semana seguinte, o día 16, Pontevedra sumarase ao calendario da Copa Galicia DHI co bautizo do DH A Fracha, organizado polo Moto Bike.
Os últimos puntos desta campaña poranse en xogo o 22 de outubro no VII DH Kamikazes en Marín (comarca do Morrazo). Nestes cinco eventos poderán participar riders desde o grupo de idade Infantil até o Máster-60.
De Manzaneda a Vigo
Entre os dous bloques nos que se divide a tempada da Copa Galiza 2023 disputaranse os outros catro descensos federados. O DH Molinos, no concello do Páramo (comarca de Sarria) e co selo do DH Galicia, exercerá o 11 de xuño de Campionato da Galiza.
A proba, que o ano pasado repartiu as coroas galegas, o Trofeo Federación DHI Manzaneda Bike Park, dá un paso máis e na súa quinta edición debuta na Copa de España.
Os mellores especialistas estatais reuniranse o 23 de xullo na cita impulsada pola Federación Ciclismo Galego na estación de montaña da Terra de Trives.
Para o verán tamén chegarán, outro ano máis, os dous descensos urbanos de BTT. O primeiro será o 30 de xuño cando teña lugar o X DHU Vila de Sarria, cun espectacular percorrido que prepara o DH Galicia.
O segundo decorrerá o 12 de agosto coa cita no Marisquiño, en Vigo, no marco dun dos principais festivais do mundo dedicados ao deporte urbano.
