Vinte proxectos para o Reino da Galiza

Proxectos editoriais, audiovisuais, músicas, guías visuais, xogos de cartas, espectáculos, recursos pedagóxicos, unha colección de roupa e até un escape room. Os vinte proxectos seleccionados no II Certame ‘Fondo de proxectos culturais do Reino da Galiza’ contribuirán a difundir diferentes aspectos do reino medieval en múltiples formatos e desde diferentes perspectivas. A deputada de cultura, Natividad González, deu a coñecer onte as propostas gañadoras dun concurso que repartirá 200.000 euros entre os proxectos seleccionados. Convocado o pasado mes de abril, o certame recibiu un total de 49 solicitudes, que foron avaliadas por un xurado composto por Diana Pelaz Flores, Carlos García Vieito e Carlos Lixó Gómez como vogais; a propia deputada de Cultura, Natividad González como presidenta, e a xefa da sección de Cultura e Deportes da Deputación da Coruña, Manuela Muñiz Souto, como secretaria. O certame desenvolve a súa segunda edición cun grande éxito de convocatoria e forma parte dunha liña de traballo da Área de Cultura da Deputación, á que se suman outras actividades. Entre elas, unha exposición itinerante sobre o medievo galego que se desenvolverá en distintas cidades durante a primavera do 2024, ou o congreso internacional celebrado o ano pasado en Santiago. O obxectivo é potenciar o coñecemento sobre o pasado do país, e máis concretamente sobre unha época tan descoñecida como a medieval, carente dun relato propio no imaxinario colectivo. "Queremos contribuir a combater a desmemoria e descoñecemento deste período de gran esplendor do noso país" destaca Natividad González, "e así poder comprender mellor a actualidade e camiñar cara un futuro con maior capacidade", engade. Héitor Picallo: "O Reino da Galiza debeu contar cun patrimonio civil moi amplo" Historias xerais e episodios particulares A diversidade de enfoques dos proxectos seleccionados ten como obxectivo achegarse a unha ampla variedade de públicos, desde estudantes a profesionais especializados. Desta forma, poden atoparse entre os proxectos seleccionados obras de carácter xeral que tentan presentar un marco histórico amplo, a carón de propostas que se centran en aspectos particulares do período. Entre os primeiros, pódense destacar, por exemplo, O segredo do Betanzos Medieval: Unha ruta histórica para descubrir unha das sete capitais do Reino de Galicia. un proxecto de Marma Sociedade Cooperativa Galega, que visa a crear unha ruta histórica sobre aspectos pouco coñecidos de Betanzos formulado a través de oito píldoras de vídeo en torno a temáticas relacionadas con episodios do reino que se relacionan estreitamente coa historia da vila. Ou a Guía Visual do Reino Medieval de Galiza, de Trespés Producións Culturais S.L.U., que combina ilustracións, mapas e fotografías para crear un recurso de referencia para público xeral e estudantado que procure saber máis sobre a Historia. Entre os segundos, cabe citar a Onda gravitatoria Balteira coa que Estíbaliz Espinosa revisita a astonomía medieval á luz da ciencia contemporánea; a realización dunha colección de roupa composta por deseños inspirados no Reino Suevo e nas Revoltas Irmandiñas; o proxecto de de Bernardino Martínez Castiñeira, que recrea, a través das artes escénicas, a viaxe que fixo pola Costa da Morte o derradeiro monarca do Reino, Afonso VIII; Porto de Bois, de Aldán López Dacosta, propón unha experiencia inmersiva centrada nun evento concreto: a Batalla de Porto de Bois de 1371, que é a última grande oportunidade dunha vitoria militar directa por parte da galega Casa de Castro. A lingua do Reino da Galiza, a debate Estudo e divulgación Da mesma forma, existen proxectos de investigación, que procuran ampliar o coñecemento sobre a historia do Reino, a carón doutros de natureza puramente divulgativa e mesmo lúdica. Así, a Fundación Catedral de Santiago de Compostela levará a cabo un de estudo sobre a alianza establecida entre a Igrexa Compostelá e os monarcas da dinastía Borgoña para o estabelecemento dun templo en Compostela, un suceso de enorme importancia para o Reino. Ao seu lado, Artefeito Producións Sociedade Cooperativa Galega presenta un escape room en liña, orientado ao alumnado de Educación Secundaria, centrado nunha visión global do Reino da Galiza. Da mesma forma, Sara Seco Rial propón difundir a historia do reino galego a través de vídeos curtos en TikTok; Noso Plans e Proxectos Sociedade Cooperativa Galega deseña un sinxelo xogo de cartas para todos os públicos, co obxectivo de divulgar a historia e vitalidade cultural do reino Suevo de Galicia; e Discordia &amp; Reconciliatione, presentado por José García Sendón, é un proxecto editorial divulgativo que ten como primeiro obxectivo verter ao galego os episodios máis interesantes da crónica ou registrum escrita en latín a comezos do século XII en Santiago coñecida como Historia Compostellana. Todos eles contribuirán, sen dúbida, a incrementar o interese e o coñecemento e pola historia do Reino medieval da Galiza. O Reino de Galiza: unha etapa de esplendor (1157-1230) Sermos Galiza céntrase nas biografías esenciais Sermos Galiza S. A., a empresa editora de Nós Diario, contribúe ao coñecemento e divulgación da historia do Reino da Galiza cun proxecto que tenta rescatar do esquecemento personaxes históricas que seguen a ser descoñecidas para a poboación galega en xeral e mesmo para o público máis interesado. Con este obxectivo, publicará tres libros que se distribuirán gratuitamente co xornal, e editará tres podcasts que resumirán o seu contido. O traballo está coordinado polo doutor en Humanidades, especialista na Idade Media e profesor da Universidade da Coruña, Alexandre Peres Vigo, quen conta cunha ampla bibliografía sobre o Reino da Galiza e que asinará o volume dedicado a Pedro Pardo de Cela. A biografía de Fernán Ruíz de Castro será elaborada por Francisco Rodríguez Sánchez, doutor en Filoloxía, catedrático de Ensino Medio e autor dunha abondosa bibliografía no ámbito da sociolingüística, a literatura e a historia. Finalmente, Carme Varela, licenciada en Filoloxía, escritora e autora do libro As Desterradas, e Carolina Casal Chico, doutora en Historia da Arte, trazarán as vidas das abadesas galegas que se opuxeron ás políticas centralizadoras dos Reis Católicos, como Constanza Vázquez en Sober e Inés de Guitián en Chantada. Dos Borgoña á monarquía de Trastámara. Os tempos de Pedro I e Henrique II