Vilagarcía cancelará o concerto de Mägo de Oz se non rectifica as súas “frivolidades” sobre drogas e prostitución
O Concello de Vilagarcía de Arousa (O Salnés) advertiu Mägo de Oz que cancelará o concerto que estaba previsto para o 19 de agosto se a banda non rectifica as "frivolidades" dun dos seus integrantes sobre as drogas e a prostitución durante un concerto en Asturias.
En concreto, nos últimos días, o grupo actuou na localidade de Llanera e o seu guitarrista, Víctor de Andrés, non só insultou o presidente do Goberno, Pedro Sánchez, senón que se referiu á trama de Koldo García, José Luis Ábalos e Santos Cerdán da seguinte forma: "Deixade de roubarnos sobre todo a cocaína e as putas".
Tras estas polémicas palabras, esta terza feira o Goberno local de Vilagarcía, do PSdeG, informa nun comunicado de que se puxo en contacto coa banda para pedir unha rectificación pública e advertilos de que o proceso de contratación do concerto, baixo a modalidade negociada sen publicidade, "non está pechado" aínda.
"Por moito que se disfrace de pretendido humor, non se poden admitir frivolizacións sobre as prostitucións ou o consumo de drogas", expresa o Concello.
"Non parece moi oportuno insultar en ningún caso a un presidente do Goberno, chámese como se chame e sexa da cor política que sexa, pero o que non é admisíbel é que se trate de banalizar ou frivolizar sobre dúas cuestións tan sensíbeis", insiste o Goberno local.
O Concello recalca que, cando pensou en contratar Mägo de Oz para o concerto fíxoo "valorando a súa creación artística e a súa traxectoria", á marxe das súas ideas políticas ou das dun membro do grupo, "que son libres, gusten ou non".
